కొత్త మాస్టర్ ప్లాన్ జాడేదీ?

జనగామ, వెలుగు: జనగామ మున్సిపల్ కొత్త మాస్టర్ ప్లాన్ అమలు మూడడగులు ముందుకు , ఆరడుగులు వెనక్కి అన్నట్టు మారింది. జిల్లా కేంద్రంగా జనగామ టౌన్ శరవేగంగా విస్తరించడం, జనాభా పెరుగుదల తో గతంలో కొత్త మాస్టర్ ప్లాన్ అవసరం అని లీడర్లు, ఆఫీసర్లు నిర్ణయించారు. దీంతో 2018 మాస్టర్ ప్లాన్ ప్రారంభించినా నేటికీ ఫైనల్ కాలేదు. 2041 యేడాది వరకు ఉండే పరిస్థితుల అంచనాలతో టౌన్ ప్లాన్ ను రూపొందించే పనిని అప్పట్లో డీడీఎఫ్ కన్సల్టెన్సీ కి అప్పగించారు. ఈ ప్రక్రియ ఏడాది క్రితం ఓ కొలిక్కి వచ్చినట్టే వచ్చి మళ్లీ నిలిచి పోయింది. టౌన్ విస్తరణ, నివాసాలు, భూములు వాటి సర్వే నెంబర్లు, ఇండస్ట్రియల్ ప్రాంతం, జల వనరులు, బఫర్ జోన్లు, రోడ్ల కనెక్టివిటీ అంశాలను ప్లాన్లోకి తీసుకున్నారు. వాటిని గతేడాది ఏప్రిల్లో డీడీఎఫ్ కన్సల్టెన్సీ ప్రతినిధులు అధికారులకు వివరించారు. అప్పటి అడిషనల్ కలెక్టర్ అబ్దుల్ హమీద్, చైర్ పర్సన్ జమున, మున్సిపల్ ఆర్డీ మైఖేల్, మున్సిపల్ కమిషనర్, కౌన్సిలర్లు సలహాలు, సూచనలు కూడా ఇచ్చారు. మరోమీటింగ్తో ఫైనల్ రిపోర్ట్ తయారు చేయాలని నిర్ణయించినా ఇప్పటికీ ఆ ప్లాన్పై ఉలుకు లేదు, పలుకు లేదు.

ప్రతిపాదనలు ఇవే..

పాత మాస్టర్ ప్లాన్లో జనగామ టౌన్ 16.77 చదరపు కిలోమీటర్ల విస్తీర్ణం ఉండగా కొత్త ప్లాన్లో 17.91 చదరపు కిలోమీటర్లకు విస్తరించడం.
టౌన్ శివారుల్లోని శామీర్పేటకు చెందిన అరవింద్ నగర్, వికాస్ నగర్, చిటకోడూరు లోని రాజీవ్ నగర్, యశ్వంతాపూర్లోని ఎల్లమ్మ టెంపుల్స్ను కలపడం
2011 లెక్కల ప్రకారం 64,430 వేలు ఉన్న జనాభా 2041 వరకు లక్షా 50 వేలకు చేరుతుందని అంచనా వేశారు. భవిష్యత్ అవసరాల కోసం రోడ్ల విస్తరణను ప్లాన్లో పెట్టారు.
ప్రధాన రహదారులుగా ఉన్న జనగామ, సూర్యాపేట, సిద్ధిపేట, హన్మకొండ, హైదరాబాద్ రోడ్లు 150 ఫీట్లు చేయడం
కొత్త వెంచర్లు, నిర్మాణాలను దృష్టిలో పెట్టుకొని ఇంటర్నల్ రోడ్లన్నీ 40 ఫీట్లకు పైనే ఉండేలా చూడటం.
జిల్లా కేంద్రంలో ట్రాఫిక్ సమస్య ను అధిగమించేందుకు ప్రస్తుతం టౌన్లో ఉన్న ఇంటర్నల్ రోడ్లను కూడా 40 నుంచి 60 ఫీట్ల మధ్య వెడల్పు చేయడం.
రైల్వే స్టేషన్ రోడ్డు రద్దీ పెరుగుతుండటంతో దీన్ని 60 ఫీట్ రోడ్ గా విస్తరించడం.
జనగామ మున్సిపల్తో కనెక్టివిటీ ఉండే ఎల్లంల, వడ్లకొండ, చిటకోడూరు, నాగారం రోడ్లను 80 ఫీట్లకు పెంచడం.
కుంటలు చెరువులు 10 హెక్టార్లకు పైగా విస్తరించి ఉంటే దాని ఎఫ్టీఎల్ పరిధికి 30 మీటర్ల వరకు నిర్మాణాలకు అనుమతి ఉండదు. 10 హెక్టార్లలోపు విస్తీర్ణం ఉన్న వాటికైతే 9 మీటర్లకు అనుమతులు ఉండవు. వాగులు, కెనాల్లుకు 2 మీటర్ల దూరం వరకు పర్మిషన్లు ఉండవు.

టౌన్ చుట్టూ రింగ్ రోడ్డు

జనగామ టౌన్ చుట్టూ రింగ్ రోడ్డు నిర్మాణం కోసం ప్లాన్ లో పెట్టారు. ప్రస్తుతం హైదరాబాద్ వరంగల్కు ఉన్న జాతీయ రహదారిని కలిపేలా హైదరాబాద్ సిద్ధిపేట రోడ్డు మీదుగా చిటకోడూరు యశ్వంతాపూర్ వద్ద కలుపుతూ రింగ్ రోడ్ ఉండాలని సూచించారు. ఇండస్ట్రీయల్ ఏరియాల్లో ఎక్కువ మొత్తం నివాసాలు ఏర్పడగా ప్లాన్లో కొంత మార్పులకు అవకాశం కల్పించాలన్న సూచనలున్నాయి. ఇండస్ట్రీయల్ జోన్లో నివాస సముదాయాలు ఎక్కువైన చోట దానిని నివాస యోగ్యంగా మార్చి ఇండస్ట్రీయల్ను టౌన్ శివా రుల్లోకి షిఫ్ట్ చేసేలా ప్లాన్ చేయాలని సూచించారు.