- పెదవులు కదపకుండా ఈల వేస్తాడు...నాలుకనే ఫ్లూట్గా చేసి పాటలు పాడతాడు
కొందరికి బొమ్మలేయడం హాబీ. ఇంకొందరికి ఆటలాడటం. మరికొందరికి సింగింగ్, డాన్సింగ్, రీడింగ్. అయితే వీటన్నింటికి కాస్త డిఫరెంట్గా ఈల వేయడాన్ని హాబీగా చేసుకున్నాడు పొన్నాల సాగర్. అందులో కూడా ఒక స్పెషాలిటీ ఉంది. పెదవులు కదపకుండా ఈల వేస్తాడు. అలాగే నాలుకనే ఫ్లూట్గా చేసుకుని పాటలు పాడతాడు. సోషల్ మీడియాలో తన ఈల పాటలతో పాపులర్ అవుతున్నాడు ఇప్పుడు. మంచిర్యాల జిల్లా రామకృష్ణాపూర్కి చెందిన ఈ స్కూల్ కరస్పాండెంట్ గురించి మరిన్ని విషయాలు.
సాధారణంగా పెదవులు కలుపుతూ చాలా మంది ఈల పాటలు పాడుతుంటారు. కానీ, సాగర్ మాత్రం నాలుకను కదిలిస్తూ గాలిని వదులుతూ అచ్చం ఫ్లూట్తో పాడినట్లు పాటలు పాడతాడు. ఓల్డ్ క్లాసిక్స్, మెలోడి, జానపదాలు, డివోషనల్.. ఇలా అన్ని జానర్స్ పాడతాడు. తెలుగుతో పాటు హిందీ పాటలు కూడా ఫ్లూట్లో పలికిస్తాడు. ఈ క్రెడిట్ అంతా ఆరేండ్ల వయసులో తనలో దాగున్న టాలెంట్ని గుర్తించిన అమ్మదే అంటాడు సాగర్.
నలుగురిలో ప్రత్యేకంగా..
మా అమ్మ రోజ్మేరీ నేను చదువుకున్న జెడ్పీఎస్ఎస్ స్కూల్లో సోషల్, కల్చరల్ టీచర్. ఒకరోజు కల్చర్ క్లాస్లో స్టూడెంట్స్కి ఈల వేయడం నేర్పించింది అమ్మ. నేను ఆ టెక్నిక్ని త్వరగా క్యాచ్ చేయడంతో ఈల వేయడంలో మరిన్ని టెక్నిక్స్ చెప్పింది. మెల్లిగా ఈల పాటలు కూడా కట్టడం మొదలుపెట్టా. ట్యూన్ బాగా రావడంతో మరింత ఎంకరేజ్ చేసింది. అలా స్కూల్ డేస్లో మొదలైన ఈల హాబీ తర్వాత ప్యాషన్గా మారింది. కానీ, ఈల పాటలు పాడేవాళ్లు లక్షల్లో ఉంటారు. వాళ్లలో ఒకడిగా నేనుంటే ప్రత్యేకత ఏముంటుంది అని, డిఫరెంట్గా ట్రై చేయాలనుకున్నా. పెదవులు కదపకుండా ఈల పాటలు పాడటం ప్రాక్టీస్ చేశా. మొదట్లో కష్టమైంది. కానీ, పట్టు వదలకుండా ప్రాక్టీస్ చేశా. సక్సెస్ అయ్యా.
అయితే నాలా పెదవులు కదపకుండా ఈల పాటలు పాడేవాళ్లు కూడా కొందరు ఉన్నారని తెలిసింది. వాళ్లందరికన్నా డిఫరెంట్గా ఇంకేం చేయొచ్చన్న ఆలోచనతో నాలుకను కదిలిస్తూ గాలిని వదులుతూ ఫ్లూట్తో పాడినట్లు పాటలు పాడటం ప్రాక్టీస్ చేశా. ఇప్పటివరకు ప్రపంచంలో ఎవరూ ఇలాంటి ప్రయోగం చేయలేదు. దాంతో అందరి దృష్టి నా మీద పడింది. రాష్ట్రంలోని వివిధ ప్రాంతాల్లో వందల్లో ప్రదర్శనలిచ్చా. ఇవన్నీ ఒకెత్తు అయితే ఎలాంటి మ్యూజిక్ ఇనుస్ట్రుమెంట్స్ లేకుండా నాలుకని ఫ్లూట్గా చేసి 0 నిమిషాల్లో 60 పాటలు పాడా. ఆ ప్రయత్నానికి ఇంటర్నేషనల్ వండర్ బుక్ ఆఫ్ రికార్డ్లో చోటు కూడా దక్కింది. కొన్ని అవార్డులు కూడా అందుకున్నా. వీటన్నింటితో పాటు నాకిష్టమైన సోషల్ సర్వీస్లోనూ యాక్టివ్గా ఉంటున్నా.
ఇతర దేశాల నుంచి ..
చిన్నప్పట్నించీ కష్టాల్లో ఉన్నోళ్లకి చేతనైనంత సాయం చేసేవాడ్ని. పెరిగి పెద్దయ్యేకొద్దీ నాలో ఆ హెల్పింగ్ నేచర్ కూడా పెరుగుతూ వచ్చింది. కానీ, ఈ దారిలో ఒక్కడినే నడిస్తే.. కొంతమందికి మాత్రమే సాయం అందుతుంది. అదే నలుగురినీ కలుపుకుంటే వీలైనంత ఎక్కువమందికి సాయ పడొచ్చు. ఈ ఆలోచనతోనే ఎనిమిదేండ్ల కిందట మా ఫ్యామిలీ, ఫ్రెండ్స్తో కలిసి ‘ మానవత స్వచ్ఛంద సేవా సంస్థ’ని మొదలుపెట్టా. దీని ద్వారా ఫండ్స్ కలెక్ట్ చేసి వయసు పైబడ్డ వాళ్లకి , అనాథలకి, ఫిజికల్లీ డిసేబుల్డ్ పిల్లలకి సాయం చేస్తున్నాం. వాళ్లకి అవసరమైన రోజువారీ సరుకులు, మెడిసిన్స్ అందిస్తున్నాం. ఓల్డేజ్ హోమ్స్ కట్టడానికి డబ్బు సాయం చేస్తున్నాం.
అలాగే గవర్నమెంట్ స్కూల్, హస్టల్స్లో హైజీన్ గురించి అవగాహన కల్పిస్తున్నాం. అయితే జపాన్, జర్మనీ, ఆస్ట్రేలియా లాంటి చాలా దేశాల నుంచి నన్ను కొందరు కాంటాక్ట్ చేస్తున్నారు. మా ఆర్గనైజేషన్లో మంచి జీతం ఇస్తాం..పర్ఫార్మెన్స్ ఇవ్వమని అడుగుతున్నారు. కానీ, ఇవన్నీ వదిలి వెళ్లలేక ఇక్కడే ఉంటున్నా. ఫ్యూచర్లో నా ఈల పాటలతో మరింత మందిని ఎంటర్టైన్ చేస్తానన్న నమ్మకం ఉంది. ::: మందమర్రి, వెలుగు