హైదరాబాద్, వెలుగు:ప్రభుత్వ ఆఫీసుల్లో పనిచేస్తున్న ఔట్సోర్సింగ్ ఉద్యోగులు పస్తులుండాల్సిన పరిస్థితి వచ్చింది. ఐదు నెలలుగా వారికి సర్కారు జీతాలివ్వకపోవడంతో 80 వేల మంది గోస తీస్తున్నారు. నిధులు లేవన్న కారణంతో ₹150 కోట్లను ఆర్థిక శాఖ విడుదల చేయట్లేదని తెలుస్తోంది. జీతాలు రాక తాము అప్పులు చేసి కుటుంబాలను పోషించుకోవాల్సిన పరిస్థితి వచ్చిందని ఉద్యోగులు బాధపడుతున్నారు. రాష్ట్రంలో మున్సిపల్, హెల్త్, పంచాయతీరాజ్ వంటి శాఖల్లోనే ఎక్కువగా ఔట్సోర్సింగ్ ఉద్యోగులున్నారు. రెవెన్యూ శాఖలో పనిచేసే సిబ్బందికైతే ఎనిమిది నెలలుగా జీతాలు రావట్లేదని తెలుస్తోంది. ఔట్సోర్సింగ్ ఉద్యోగులకు జీతాలు రాకపోవడంతో వాళ్ల కుటుంబాలు ఆర్థికంగా ఇబ్బందులు పడుతున్నాయని సీఐటీయూ రాష్ట్ర కార్యదర్శి పాలడుగు భాస్కర్ అన్నారు. ప్రభుత్వం వెంటనే జీతాలిచ్చి ఆదుకోవాలని డిమాండ్ చేశారు. నిధుల కొరత పేరిట జీతాలు నిలిపేయడం సరైంది కాదన్నారు.
