- మాస్ ప్రమోట్ చేయాలని ధర్నా
- శాతవాహన యూనివర్సిటీ విద్యార్థుల ధర్నా
జమ్మికుంట, వెలుగు: శాతవాహన యూనివర్సిటీ పరిధిలోని విద్యార్థులందరినీ మాస్ప్రమోట్ చేయాలని డిమాండ్ చేస్తూ కరీంనగర్జిల్లా జమ్మికుంటలో విద్యార్థి సంఘాలు సోమవారం ధర్నా నిర్వహించాయి. టౌన్లోని పలు కాలేజీల స్టూడెంట్లు ఆందోళనకు మద్దతు తెలిపారు. ఈ సందర్భంగా ఏబీవీపీ కార్యదర్శి గట్టు సాయిరాం, ఎన్ఎస్ యూఐ జిల్లా కో-ఆర్డినేటర్ పర్లపల్లి నాగరాజు మాట్లాడుతూ.. శాతవాహన యూనివర్సిటీ పరిధిలోని కాలేజీల్లో సిలబస్ పూర్తికాకపోయినా ఎగ్జామ్స్ నిర్వహించాలనుకోవడం బాధకారమన్నారు. వర్సిటీ అధికారులు పరీక్షల పేరుతో విద్యార్థులను ఇబ్బందులకు గురిచేస్తున్నారని ఆరోపించారు. ఓయూ, కేయూలు సెల్ఫ్ సెంటర్లు పెడుతుంటే శాతవాహన మాత్రం విద్యార్థుల జీవితాలతో ఆడుకుంటోందని ఆవేదన వ్యక్తం చేశారు. కరోనా థర్డ్ వేవ్ని దృష్టిలో పెట్టుకుని ప్రతిఒక్కరినీ ప్రమోట్ చేయాలని కోరారు. లేకుంటే సెల్ఫ్ సెంటర్లలో డిగ్రీ పరీక్షలు నిర్వహించాలని డిమాండ్ చేశారు. విద్యార్థుల ధర్నాతో భారీగా ట్రాఫిక్ నిలిచిపోయింది. పోలీసులు బలవంతంగా ఆందోళనకారులను అక్కడి నుంచి తరలించారు. తోపులాటలో గట్టు సాయిరాం స్పృహ కోల్పోయాడు. ఈ కార్యక్రమంలో ఏబీవీపీ, ఎన్ఎస్ యూఐ నాయకులు గణపతిరెడ్డి, శ్రీకాంత్, శ్రీనాథ్, వికాస్, అజయ్, మహమ్మద్ సజ్జు, రత్నాకర్ గౌడ్ తదితరులు పాల్గొన్నారు.
