- నచ్చిన డ్రెస్ వేసుకునే స్వేచ్ఛ స్టూడెంట్లకు ఉంది: సుప్రీంకోర్టు
- ఏ డ్రెస్ వేసుకోవాలో మీరెలా డిసైడ్ చేస్తారు?
- పేర్లు రిలీజియన్ను బయటపెట్టట్లేదా?
- బొట్టు, బిందీని ఎందుకు నిషేధించలేదు?
- ముంబైలోని ట్రాంబే ఎడ్యుకేషన్ సొసైటీని ప్రశ్నించిన బెంచ్
- హిజాబ్, బుర్ఖా, క్యాప్ను నిషేధిస్తూ జారీ చేసిన సర్క్యులర్పై స్టే
న్యూఢిల్లీ: నచ్చిన దుస్తులు ధరించే స్వేచ్ఛ విద్యార్థినులకు ఉందని సుప్రీం కోర్టు తేల్చి చెప్పింది. ఏ విద్యాసంస్థ అయినా సరే విద్యార్థులను డ్రెస్సింగ్విషయంలో బలవంతం చేయడానికి వీల్లేదని స్పష్టం చేసింది. క్యాంపస్లో హిజాబ్, బుర్ఖా, క్యాప్, నఖాబ్ను నిషేధిస్తూ ముంబైలోని ఓ కాలేజీ జారీ చేసిన సర్క్యులర్పై సుప్రీంకోర్టు స్టే విధించింది. తమకు నచ్చినట్లు ఉండాలని కాలేజీ యాజమాన్యాలు స్టూడెంట్లను ఆదేశించడం సరికాదని జస్టిస్ సంజీవ్ ఖన్నా, జస్టిస్ సంజీవ్ కుమార్తో కూడిన బెంచ్ పేర్కొంది. ఈమేరకు ఎన్జీ ఆచార్య, డీకే మరాఠీ కాలేజీలను నిర్వహిస్తున్న చెంబూర్ ట్రాంబే ఎడ్యుకేషన్ సొసైటీకి నోటీసులు జారీ చేసింది. నవంబర్ 18 లోపు విద్యార్థినుల డ్రెస్ కోడ్పై విధించిన నిషేధంపై వివరణ ఇవ్వాలని ఆదేశించింది. ఎన్జీ ఆచార్య, డీకే మరాఠీ కాలేజీ జారీ చేసిన సర్క్యూలర్లను సవాల్ చేస్తూ కొన్ని విద్యార్థి సంఘాలు బాంబే హైకోర్టును ఆశ్రయించాయి. కాలేజీ జారీ చేసిన సర్క్యులర్ను బాంబే హైకోర్టు సమర్థించింది. దీంతో హైకోర్టు తీర్పును సవాల్ చేస్తూ వారు సుప్రీం కోర్టులో పిటిషన్ దాఖలు చేశారు. హిజాబ్, బుర్ఖా నిషేధం కారణంగా విద్యార్థినులు క్లాసులకు హాజరుకాలేకపోతున్నారని పిటిషన్లో పేర్కొన్నారు.
క్లాస్ రూముల్లో బుర్ఖా వేయొద్దు
‘‘ఏ డ్రెస్సు వేసుకోవాలన్నది విద్యార్థినులే డిసైడ్ చేసుకోవచ్చు. ఈ డ్రెస్ వేయాలి.. ఈ డ్రెస్ వేయొద్దు.. అనే హక్కు ఏ కాలేజీకి లేదు. దేశంలో ఎన్నో మతాలు ఉన్నాయన్న విషయం మీకు తెలీదా? సడెన్గా నిద్రలో నుంచి లేచినట్లు ఉంది మీ వ్యవహారం. అమ్మాయిల డ్రెస్సింగ్ను మీరు నిర్ణయించడం దురదృష్టకరం. స్టూడెంట్ల పేర్లు వారి మతపరమైన గుర్తింపును బయటపెట్టట్లేదా? అలాగని ఇకపై వారిని నంబర్లతో పిలుస్తారా? స్టూడెంట్ల మత విశ్వాసాలను బహిర్గతం చేయకూడదనే ఉద్దేశ్యంతో కాలేజీ యాజమాన్యాలు తిలక్(బొట్టు), బిందీలను ఎందుకు నిషేధించలేదు?’’అని ప్రశ్నించింది. క్లాస్ రూమ్లో అమ్మాయిలు బుర్ఖా ధరించరాదని సుప్రీం కోర్టు స్పష్టం చేసింది. క్యాంపస్లో ఎలాంటి మతపరమైన కార్యకలాపాలకు అనుమతి లేదని పేర్కొన్నది.
