- సోషల్ మీడియాను అడ్డంపెట్టుకొని కేటీఆర్ అబద్దాల ప్రచారం
- కామారెడ్డి సభకు పెద్ద ఎత్తున తరలిరావాలి
- మంత్రి సీతక్క
కామారెడ్డి, వెలుగు : బీసీలకు 42 శాతం రిజర్వేషన్లు కల్పించేందుకు రాష్ర్ట ప్రభుత్వం కృషి చేస్తుందని మంత్రి సీతక్క పేర్కొన్నారు. గురువారం కామారెడ్డి జిల్లా భిక్కనూరు, దోమకొండ, బీబీపేట మండల కేంద్రాల్లో జరిగిన కాంగ్రెస్ సమావేశాల్లో ఆమె పాల్గొని మాట్లాడారు. రిజన్వేషన్ బిల్లుకు రాష్ర్ట ప్రభుత్వం ఆమోదించి పంపినప్పటికీ కేంద్రంలోని బీజేపీ ప్రభుత్వం పట్టించుకోవడం లేదని విమర్శించారు. ఈ నెల 15న కామారెడ్డి జిల్లా కేంద్రంలో కాంగ్రెస్ ఆధ్వర్యంలో నిర్వహించే భారీ సభ విజయవంతం కోసం మండలాల్లో విస్తృత స్థాయి మీటింగ్లు నిర్వహించినట్లు తెలిపారు. కుల గణనలో బీజేపీ, బీఆర్ఎస్ నాయకులు పాల్గొనలేదన్నారు. సోషల్ ఇంజినీరింగ్, సోషల్ జస్టీస్ జరగాలన్నదే తమ ఉద్దేశమన్నారు.
ఇందుకోసమే బీసీలకు 42 శాతం రిజర్వేషన్లు స్థానిక సంస్థల్లో కల్పించేందుకు రాష్ర్ట ప్రభుత్వం చర్యలు చేపట్టిందన్నారు. కేటీఆర్ సోషల్ మీడియాను అడ్డం పెట్టుకొని అబద్దాలను ప్రచారం చేస్తున్నారని విమర్శించారు. తాము కులగణన చేపడితే బీఆర్ఎస్, బీజేపీ నాయకులు పాల్గొనలేదన్నారు. బీఆర్ఎస్ 10 ఏండ్లు అధికారంలో ఉండి ఒక్క రేషన్ కార్డు ఇవ్వలేదన్నారు. పేదలకు ఇందిరమ్మ ఇండ్లు మంజూరు చేసి వారి సొంతింటి కలను ప్రభుత్వం నెరవేరుస్తుందన్నారు.
మహిళలను కోటీశ్వరులను చేసే ఉద్దేశంతో అనేక కార్యక్రమాలు చేపట్టామన్నారు. మహిళా సంఘాలకు క్యాంటీన్లు, బస్సులు, పెట్రోల్ బంక్లు వంటివి ఏర్పాటు చేయిస్తున్నామన్నారు. బీజేపీ, బీఆర్ఎస్ లు కార్పొరేట్ సంస్థల కోసం పని చేస్తే కాంగ్రెస్ పేదల కోసం పని చేస్తుందన్నారు. నాడు స్వాతంతం కోసం, నేడు ప్రజల అభివృద్ధి కోసం కాంగ్రెస్ పోరాడుతుందన్నారు. దేవుడు గుడిలో ఉండాలి, భక్తి గుండెల్లో ఉండాలని, కుల, మతాల పేరుతో బీజేపీ ప్రజలను రెచ్చగొడుతోందని మంత్రి విమర్శించారు. యూరియా అందించే బాధ్యత కేంద్ర ప్రభుత్వానిదన్నారు. ఈ నెల 15న కామారెడ్డిలో నిర్వహించే సభ కనివిని ఎరుగని రీతిలో నిర్వహిస్తామన్నారు.
అణగారిన వర్గాల కోసం పోరాటం ప్రభుత్వ సలహాదారు షబ్బీర్అలీ
అణగారిన వర్గాల సంక్షేమం కోసం కాంగ్రెస్ పోరాటం చేస్తోందని ప్రభుత్వ సలహాదారు షబ్బీర్అలీ పేర్కొన్నారు. ఈ పోరాటానికి ప్రజలు మద్దతు ఇవ్వాలన్నారు. కామారెడ్డిలో ప్రకటించిన బీసీ డిక్లరేషన్ అసెంబ్లీలో తీర్మానించి కేంద్రానికి పంపామని, దీని ఆమోదం కోసం ఢిల్లీలో ధర్నా చేశామన్నారు. జిల్లా లైబ్రరీ చైర్మన్ మద్ది చంద్రకాంత్రెడ్డి, డీసీసీ ప్రెసిడెంట్ కైలాస్ శ్రీనివాస్రావు, పీసీసీ జనరల్ సెక్రటరీ బద్దం ఇంద్రకరణ్రెడ్డి, పార్టీ మండల శాఖ ప్రెసిడెంట్లు భీమ్రెడ్డి, సుతారి రమేశ్ తదితరులు పాల్గొన్నారు.
