- డిక్షనరీలో జాతరలు, పండుగల్లో మాట్లాడే భాషకు అర్థాలు
హైదరాబాద్, వెలుగు: రాష్ట్రంలోని ఏ గ్రామం చూసినా గ్రామదేవతలు, ఇంటి దేవతలు, వన దేవతలకు కొదవ లేదని టూరిజం శాఖ ముఖ్య కార్యదర్శి శైలజ రామయ్యర్ అన్నారు. జాతరలు, పండుగల సందర్భంగా ప్రజలు మాట్లాడే భాషకు అర్థాలు తెలియజేసే డిక్షనరీని తెలంగాణ సాహిత్య అకాడమీ ముద్రించడం అభినందనీయమని చెప్పారు.
శనివారం రవీంద్ర భారతిలోని టూరిజం కార్యాలయంలో తెలంగాణ సాహిత్య అకాడమీ ముద్రించిన తెలంగాణ సాంస్కృతిక పదకోశం అనే డిక్షనరీని శైలజ రామయ్యర్ ఆవిష్కరించారు. ప్రజలకు ఎల్లప్పుడూ అవసరమయ్యే చారిత్రక ప్రాధాన్యత కలిగిన జాతర్లకు సంబంధించిన సాంస్కృతిక పద కోశాన్ని వెలువరించడం చాలా బాగుందని పేర్కొన్నారు. ఇంత మంచి గ్రంథాన్ని ప్రజల్లోకి తీసుకొచ్చిన రచయితలు, గ్రంథ సంపాదకులతో పాటు అకాడమీ కార్యదర్శి బాలాచారిని అభినందించారు. ఈ కార్యక్రమంలో టూరిజం శాఖ సంచాలకులు కె. నిఖిల, తెలంగాణ సాహిత్య అకాడమీ కార్యదర్శి డాక్టర్ బాలాచారి, డాక్టర్ రాపోలు సుదర్శన్, అకాడమీ సిబ్బంది పాల్గొన్నారు.
