పన్నెండేళ్ల వయసులో జరిగిన కారు యాక్సిడెంట్ ఆమె ముఖాన్ని మార్చేసింది. దానికి తోడు ఆగిపోతుంది అనుకున్న గుండెకి పేస్మేకర్ పెట్టారు డాక్టర్లు. ఇన్ని సమస్యలు ఉన్నా జీవితం ముగిసిపోయింది అనుకోలేదు తను. అందాల పోటీల్లో పార్టిసిపేట్ చేసింది. ‘మిస్ వరల్డ్ అమెరికా –2021’ పోటీలో విన్నర్గా నిలిచింది. ఈ పోటీల్లో గెలిచిన మొదటి ఇండియన్ అమెరికన్గా గుర్తింపు తెచ్చుకుంది శ్రీ సైనీ. అమెరికాలోని వాషింగ్టన్ డిసిలో ఉండే సైనీకి చిన్నప్పటి నుంచి అందాల పోటీల్లో పార్టిసిపేట్ చేయాలనే కల ఉండేది. కారు ప్రమాదంలో ముఖమంతా గాయాలయ్యాయి. అయినా కూడా ఆమెలో కాన్ఫిడెన్స్ ఇసుమంతైనా తగ్గలేదు. ఆ కాన్ఫిడెన్స్తోనే అందాల పోటీల్లో గెలుస్తూ వచ్చింది. తాజాగా లాస్ ఏంజెలెస్లో ‘మిస్వరల్డ్ అమెరికా’ కిరీటాన్ని అందుకుంది సైనీ. కరోనా టైమ్లో ‘బ్యూటీ విత్ పర్పస్’ క్యాంపెయిన్కి నేషనల్ అంబాసిడర్గా ఉన్న సైనీ కొవిడ్ రిలీఫ్ ఫండ్కి వేల డాలర్లు కలెక్ట్ చేసింది. ఆపదలో ఉన్నవాళ్లకి, పేదవాళ్లకి సాయం చేయడంలో ముందుండే సైనీని అంతా ‘బ్యూటీ విత్ పర్పస్’ అని మెచ్చుకుంటున్నారు.
అమ్మానాన్న ప్రోత్సాహంతో...
‘‘నాకు చాలా సంతోషంగా ఉంది. నా ఫీలింగ్స్ మాటల్లో చెప్పలేకపోతున్నా. ఈ క్రెడిట్ అంతా మా అమ్మానాన్నదే. నాకు ఈ గౌరవం ఇచ్చినందుకు థ్యాంక్స్. నాకు గుండె వాల్వ్లో బ్లాక్ ఉంది. పేస్మేకర్ పెట్టారు. యాక్సిడెంట్లో ముఖమంతా దెబ్బతింది. మీ అందరి ఆశీర్వాదంతో వీటిని ఎదుర్కొని గెలవగలిగాను” అని చెప్పింది సైనీ.