వీకే నరేష్ ప్రధాన పాత్రలో రూపొందుతోన్న చిత్రం ‘శుభకృత్ నామ సంవత్సరం’. ఎస్ఎస్ సజ్జన్ దర్శకత్వంలో విశ్వనాథ్ నాయక్ నిర్మిస్తున్నారు. సోమవారం ఈ మూవీ గ్లింప్స్ లాంచ్ ఈవెంట్ను నిర్వహించారు. అతిథిగా హాజరైన హీరో శ్రీ విష్ణు మాట్లాడుతూ ‘నరేష్ గారు ప్రతి సినిమాకి ఒక వేరియేషన్ ఇస్తున్నారు. కొత్త డైరెక్టర్స్ని ప్రోత్సహిస్తున్నారు. ఆయన సినిమాలో ఉంటే చాలు అనే ఒక ఇమేజ్ని క్రియేట్ చేసుకున్నారు. ఏ పాత్ర అయినా సరే అద్భుతంగా చేయగలిగే నటుడు. ఈ సినిమా మంచి సక్సెస్ అవ్వాలని మనస్ఫూర్తిగా కోరుకుంటున్నా’ అని అన్నాడు.
నరేష్ మాట్లాడుతూ ‘అద్భుతమైన కంటెంట్ ఉన్న సినిమా ఇది. డ్రామా, సస్పెన్స్, ట్రావెల్ ఇలా చాలా వేరియేషన్స్ ఉంటాయి. తెలుగు, కన్నడలో చాలా మంచి స్టార్ కాస్ట్తో వస్తున్న ఈ సినిమా టైటిల్ వినగానే అందరూ పాజిటివ్గా ఉందని చెప్పారు. మంచి విజయం సాధించే అన్ని అర్హతలు ఉన్న ఈ సినిమా కొన్నేళ్లపాటు గుర్తుండిపోతుంది’ అని అన్నారు. ఇదొక అద్భుతమైన కాన్సెప్ట్ అని, ఇందులో నరేష్ గారు డిఫరెంట్ క్యారెక్టర్లో కనిపించబోతున్నారని చిత్ర దర్శకుడు సజ్జన్ చెప్పాడు. మంచి కథతో నిర్మాతగా పరిచయం అవడం ఆనందంగా ఉందని నిర్మాత విశ్వనాథ్ నాయక్ అన్నారు. దర్శకుడు రామ్ అబ్బరాజు, నిర్మాత రాజేష్ దండా కార్యక్రమంలో పాల్గొని టీమ్కు ఆల్ ద బెస్ట్ చెప్పారు.
