హనుమకొండ, వెలుగు: కాకతీయ యూనివర్సిటీలో కలకలం రేపిన ఎంఎస్సీ కెమిస్ట్రీ సెకండియర్ విద్యార్థిని పెద్దమళ్ల శ్రీవిద్య(22) ఆత్మహత్య ఘటనలో ఆరుగురు విద్యార్థినులను యూనివర్సిటీ అధికారులు సస్పెండ్ చేశారు. ఒక సెమిస్టర్ పాటు వారిని సస్పెండ్ చేస్తున్నట్లు యూనివర్సిటీ రిజిస్ట్రార్ ప్రొఫెసర్ వి.రామచంద్రం బుధవారం సాయంత్రం ఉత్తర్వుల్లో పేర్కొన్నారు. ఖమ్మం జిల్లా ఎర్రుపాలెం మండలం బనిగండ్లపాడుకు చెందిన విద్యార్థిని శ్రీవిద్య కేయూలోని పద్మాక్షి హాస్టల్లో ఉంటూ చదువుతోంది. హాస్టల్లో ఆరుగురు సీనియర్ స్టూడెంట్స్ తనపై దొంగతనం నెపం వేయడంతో పాటు పలుమార్లు రూమ్లో దాడి చేశారని ఆరోపిస్తూ ఆమె ఆత్మహత్యాయత్నానికి పాల్పడింది.
హాస్టల్లో సీనియర్లతో జరిగిన గొడవ తర్వాత మార్చి 7, 8 తేదీల్లో ఆమె తన అమ్మమ్మ ఇంట్లో ఎలుకల మందు తాగి సూసైడ్ అటెంప్ట్ చేసింది. అనంతరం హైదరాబాద్లోని నిమ్స్లో చికిత్స పొందుతూ మార్చి 16న మృతి చెందింది. మరణానికి ముందు ఆమె ఆరుగురు సీనియర్ల పేర్లు చెబుతూ, వారు తనను కొట్టడం వల్లే సూసైడ్ అటెంప్ట్ చేసినట్లు వెల్లడించింది. ఈ ఘటన రాష్ట్రవ్యాప్తంగా కలకలం రేపడంతో యూనివర్సిటీ రిజిస్ట్రార్ ప్రొఫెసర్ వి. రామచంద్రం విచారణ కోసం ఏడుగురు సభ్యులతో కూడిన కమిటీని నియమించారు. విద్యార్థినులకు సంబంధించిన సున్నిత అంశం కావడంతో కమిటీ సభ్యులు క్షేత్రస్థాయిలో విచారణ జరిపి నివేదిక సమర్పించారు. ఆ నివేదిక ఆధారంగా కెమిస్ట్రీ, బయోటెక్నాలజీ విభాగాలకు చెందిన మొత్తం ఆరుగురు విద్యార్థినులపై ఒక సెమిస్టర్ పాటు సస్పెన్షన్ విధించాలని యూనివర్సిటీ అధికారులు నిర్ణయించారు. ఈ నిర్ణయం ప్రస్తుతం యూనివర్సిటీలో తీవ్ర చర్చనీయాంశంగా మారింది.
