స్మార్ట్ ఫోన్, గాడ్జెట్స్లో కొత్త అప్డేట్స్ కోసం ఎదురు చూస్తుంటారు యూజర్లు. కంటెంట్ క్రియేటర్స్ అనుకోండి... యూట్యూబ్, సోషల్మీడియా యాప్స్లో తాజా ఫీచర్ల గురించి ఆరా తీస్తారు. అందుకని ట్విట్టర్ నుంచి యుపిఐ పేమెంట్ యాప్స్ వరకు ఎప్పటికప్పుడు కొత్త అప్డేట్స్ అందిస్తుంటాయి. ట్విట్టర్ సర్కిల్, గూగుల్ వ్యాలెట్ యాప్, యూట్యూబ్లో గ్రీన్ స్క్రీన్ వంటి ఫీచర్లు అందరికీ నచ్చుతాయి. ఈవారం టెక్నాలజీ అప్డేట్స్ గురించి మరింతగా...
ట్వీట్ షేరింగ్ కొందరికే...
ట్విట్టర్లో ఏదైనా ట్వీట్ పెడితే అందరికీ కనిపిస్తుంది. అలాకాకుండా ఫ్రెండ్స్, ముఖ్యమైనవాళ్లకు మాత్రమే కొన్ని ట్వీట్స్ షేర్ చేయాలి అనుకుంటున్నారా! అయితే, కొన్ని రోజులు ఆగాల్సిందే. త్వరలోనే ‘ట్విట్టర్ సర్కిల్’ అనే కొత్త ఫీచర్ తెస్తున్నట్టు చెప్పింది ట్విట్టర్. ఈ ఫీచర్ వస్తే ఫ్రెండ్స్, ముఖ్యమైనవాళ్లు... ఇలా దాదాపు150 మందికి ఒకే ట్వీట్ని షేర్ చేయొచ్చు. ఆ ట్వీట్ వాళ్లకు మాత్రమే కనిపిస్తుంది. ఈ కొత్త ఫీచర్ డెవలపింగ్ స్టేజ్లో ఉంది. ఇన్స్టాగ్రామ్లోని ‘క్లోజ్ ఫ్రెండ్స్’ ఫీచర్ని పోలి ఉంటుంది.
ఈ ఫీచర్ ఇలా పనిచేస్తుంది
ఫాలో అయ్యేవాళ్లని, ఫాలో కానివాళ్లని మొత్తం150 మందిని సెలక్ట్ చేసుకోవాలి. ఏదైనా ట్వీట్ పంపించేముందు ‘ట్విట్టర్ సర్కిల్’ ఆప్షన్ని ఎంచుకుంటే ఆ ట్వీట్ వీళ్లకు మాత్రమే వెళ్తుంది. అంతేకాదు యూజర్లు ఈ లిస్ట్లో మార్పులు చేసుకోవచ్చు. కొందరిని తీసేయొచ్చు. కొత్తవాళ్లని యాడ్ చేసుకోవచ్చు కూడా. ఇంకో విషయం ఏంటంటే... ట్విట్టర్ సర్కిల్లోంచి తీసేసిన విషయం అవతలివాళ్లకు తెలియదు.
కాల్ రికార్డింగ్ యాప్స్కి బ్రేక్
ఆండ్రాయిడ్ ఫోన్లలో కాల్ రికార్డింగ్ కోసం కొన్ని యాప్స్ వాడుతుంటారు చాలామంది. అయితే, యూజర్ల సేఫ్టీ, ప్రైవసీ కోసం కాల్ రికార్డింగ్ యాప్స్ని నిలిపివేయనుంది గూగుల్. దాంతో ఇప్పటికే ఫోన్లలో ఇన్స్టాల్ చేసుకున్న థర్డ్ పార్టీ కాల్ రికార్డింగ్ యాప్స్ ఇకపై పనిచేయవు. అయితే, గూగుల్ ఈయాప్స్ని ఎలా బ్యాన్ చేస్తుందనే విషయంలో క్లారిటీ లేదు.
గూగుల్ ప్లే స్టోర్లో ఇవి డౌన్లోడ్ కాకుండా చేస్తుందా లేదా ఆ యాప్స్ని ప్లేస్టోర్ నుంచి తీసెయ్యమని డెవలపర్స్ని అడుగు తుందా? అనేది తెలియాల్సి ఉంది. ఆండ్రాయిడ్ ఫోన్లలో కాల్ రికార్డింగ్ చేయడానికి ఆండ్రాయిడ్ యాక్సెసబిలిటీ ఎపిఐ (అప్లికేషన్ ప్రోగ్రామింగ్ ఇంటర్ఫేస్) అప్లికేషన్ ఉపయోగపడుతుంది. ఇకపై ఈ అప్లికేషన్ పనిచేయదు. అంటే కాల్ రికార్డింగ్ యాప్స్లో కాల్స్ రికార్డ్ అవ్వవు. అయితే, మామూలుగా ఫోన్ మట్లాడేటప్పుడు ‘కాల్ రికార్డ్’ బటన్ నొక్కితే కాల్ రికార్డ్ అవుతుంది.
కొత్త యుపిఐ ఐడీలు
ఇప్పుడు ఏ షాప్లో చూసినా యుపిఐ స్కానర్స్ కనిపిస్తున్నాయి. వాటిని స్కాన్ చేసి, చిటికెలో పేమెంట్స్ చేసేయొచ్చు. అయితే, కొన్నిసార్లు యుపిఐ (యునిఫైడ్ పేమెంట్ ఇంటర్ఫేస్) పేమెంట్స్ చేసేటప్పుడు బ్యాంక్ సర్వర్ బిజీ అని చెప్తుంది. దాంతో పేమెంట్ చేయడం సాధ్యం కాదు. అలాంటప్పుడు రెండు మూడు యుపిఐ ఐడీలు ఉంటే ఆ ఇబ్బంది ఉండదు. యూజర్లు ఒక బ్యాంక్ అకౌంట్కి కనీసం 4 యూపిఐ ఐడీలు పెట్టుకోవచ్చు.
ఎలా క్రియేట్ చేయాలంటే..
గూగుల్ ప్లేలో కొత్త యుపిఐ ఐడీలు క్రియేట్ చేయడం కోసం.. గూగుల్ పే యాప్లో పేమెంట్ మెథడ్స్ ఆప్షన్పై క్లిక్ చేయాలి. కొత్త యుపిఐ ఐడీకి జతచేయాల్సిన బ్యాంక్ అకౌంట్ని ఎంచుకోవాలి. తర్వాత ‘మేనేజ్ యుపిఐ ఐడీస్’ ఆప్షన్ని సెలక్ట్ చేయాలి. కొత్త యుపిఐ ఐడీ పక్కన కనిపించే
‘+’ ఐకాన్ మీద నొక్కితే ఐడీ క్రియేట్ అవుతుంది. వెంటనే ఫోన్కి కొత్త ఐడీ కన్ఫర్మేషన్ మెసేజ్ వస్తుంది. పేమెంట్స్ చేసేటప్పుడు నాలుగింటిలో ఏదో ఒక యుపిఐ ఐడీని ఎంచుకోవచ్చు.
ఆన్ లైన్ పేమెంట్ యాప్స్ వచ్చాక జేబులో పర్స్ లేకున్నా నడిచిపోతోంది. వీటికి తోడు ఐ ఫోన్ యూజర్లకు యాపిల్ వ్యాలెట్ యాప్, సామ్సాంగ్ పే వంటి యాప్స్ ఉన్నాయి. ఆండ్రాయిడ్ యూజర్ల కోసం గూగుల్ త్వరలోనే ఒక కొత్త వ్యాలెట్ యాప్ తీసుకురాబోతోంది. పేరు గూగుల్ వ్యాలెట్ యాప్. నలభై దేశాల్లోని యూజర్లకు ఈ యాప్ అందుబాటులోకి రానుంది. ఇదొక వర్చువల్ వ్యాలెట్. ఇందులో డబ్బులు వేసి, అవసరమైనప్పుడు ఖర్చు చేయొచ్చు. అంతేకాదు బ్యాంక్ కార్డు వివరాల్ని ఈ వ్యాలెట్లో స్టోర్ చేసుకోవచ్చు. ఫ్లయిట్ టికెట్స్ ఇందులో పెడితే, ఫ్లయిట్ ఆలస్యమైనప్పుడు నోటిఫికేషన్స్ వస్తాయి. ఈ యాప్లో స్టూడెంట్స్ ఐడీ కార్డ్స్, వ్యాక్సిన్ సర్టిఫికెట్, ఈవెంట్స్ కి సంబంధించిన టికెట్లను స్క్రీన్ షాట్ తీసి పెట్టుకోవచ్చు.
