హోలీ పండక్కి కొత్త అల్లుడు ఇంటికి వస్తే మర్యాద చేస్తారు ఎవరైనా. కానీ ఈ ఊర్లో మాత్రం హోలీ రోజున కొత్త అల్లుడిని గాడిద మీద ఊరేగిస్తారు. అలా ఎందుకు చేస్తారంటే.. అది వాళ్ల ఆచారంలో భాగం. తొంభై ఏండ్లుగా వస్తోంది ఈ ట్రెడిషన్. ఈ వింత ఆచారం మహారాష్ట్రలోని బీడ్ జిల్లాలో ఉన్న విద అనే గ్రామంలో ఉంది. హోలీ పండుగ నాలుగు రోజుల్లో ఉందనగా... ఊరివాళ్లంతా కలిసి తమ ఊరి ఆడపిల్లను పెండ్లి చేసుకున్న కొత్త పెండ్లి కొడుకుని గుర్తిస్తారు. హోలీ రోజున గాడిద ఊరేగింపు నుంచి తప్పించుకోకుండా అతడిని ఓ కంట కనిపెడతారు. పండుగ రోజు ఉదయాన్నే ఆ కొత్త అల్లుడికి కొత్త బట్టలు ఇచ్చి, మెడలో దండ వేసి, రంగులు పూస్తారు. తర్వాత గాడిద మీద ఊరేగిస్తారు. ఊరి మధ్యలో మొదలైన ఈ ఊరేగింపు, అక్కడి ఆంజనేయుడి గుడి దగ్గరకు చేరుతుంది. ఆ ఊరికి చెందిన ఆనంద్రావు దేశ్ముఖ్తో మొదలైంది ఈ ఆచారం. ఆయన తన అల్లుడిని హోలీ రోజున గాడిద మీద ఊరంతా తిప్పాడు. అప్పటి నుంచి ప్రతి ఏటా హోలీకి ఈ ట్రెడిషన్ పాటిస్తున్నారు.
