FIFA World Cup 2026: న్యూయార్క్ న్యూజెర్సీ వేదికగా జరిగిన ఫిఫా ప్రపంచకప్ (FIFA World Cup 2026) హై-వోల్టేజ్ ఫైనల్ మ్యాచ్లో స్పెయిన్ (La Roja) సంచలనం సృష్టించింది. హోరాహోరీగా సాగిన ఈ మెగా ఫైట్లో డిఫెండింగ్ ఛాంపియన్ అర్జెంటీనాను ఎక్స్ట్రా టైమ్లో 1–0 గోల్ తేడాతో ఓడించి, స్పెయిన్ చరిత్రలో రెండోసారి ప్రపంచ విజేతగా నిలిచింది. మ్యాచ్ ముగిసిన అనంతరం జరిగిన బహుమతి ప్రధానోత్సవంలో అమెరికా అధ్యక్షుడు డొనాల్డ్ ట్రంప్ ముఖ్య అతిథిగా హాజరై, స్పెయిన్ కెప్టెన్ రోడ్రికి ప్రతిష్టాత్మకమైన ఫిఫా గోల్డెన్ ట్రోఫీని అందించారు.
ఎక్స్ట్రా టైమ్లో ఫెర్రాన్ టోర్రెస్ మ్యాజిక్:
మ్యాచ్ ప్రారంభం నుంచి లూయిస్ డి లా ఫ్యూయెంటె నేతృత్వంలోని స్పెయిన్ జట్టు బంతిని ఎక్కువసేపు తమ ఆధీనంలో ఉంచుకుంటూ (Possession) అర్జెంటీనా డిఫెన్స్పై ఒత్తిడి పెట్టింది. అయితే, అర్జెంటీనా గోల్కీపర్ ఎమిలియానో మార్టినెజ్ అద్భుతమైన సేవ్స్తో స్పెయిన్ను చాలాసేపు అడ్డుకున్నాడు. నిర్ణీత 90 నిమిషాల్లో ఇరు జట్లు ఎలాంటి గోల్ చేయకపోవడంతో మ్యాచ్ ఎక్స్ట్రా టైమ్కు వెళ్లింది. ఇక మ్యాచ్ 106వ నిమిషంలో స్పెయిన్ నిరీక్షణకు తెరపడింది. పెడ్రో పోర్రో అందించిన క్రాస్ను నికో విలియమ్స్ హెడర్ ద్వారా పాస్ చేయగా.. దానిని అందుకున్న ఫెర్రాన్ టోర్రెస్ మెరుపు వేగంతో గోల్ పోస్ట్లోకి పంపి స్పెయిన్కు 1–0 ఆధిక్యాన్ని అందించాడు.
10 మందితోనే పోరాడిన అర్జెంటీనా:
నిర్ణీత సమయం ముగిసే సమయానికి అర్జెంటీనా మిడ్ఫీల్డర్ ఎంజో ఫెర్నాండెజ్ రెడ్ కార్డ్ తో వలన మైదానాన్ని వీడటంతో అర్జెంటీనా జట్టు 10 మందితోనే ఆడాల్సి వచ్చింది. ఒక ఆటగాడు తక్కువగా ఉన్నప్పటికీ, అర్జెంటీనా జట్టు చివరి విజిల్ పడేవరకు ఈక్వలైజర్ (1–1తో సమం చేయడం) కోసం చాలానే పోరాడింది. కానీ స్పెయిన్ పటిష్టమైన డిఫెన్స్ను ఛేదించలేకపోయింది. ఈ ఓటమితో లియోనెల్ మెస్సీ అంతర్జాతీయ కెరీర్కు ఘనమైన ముగింపు ఇవ్వాలనే అర్జెంటీనా కల భగ్నమైంది.
ప్రెజెంటేషన్ సెర్మనీలో డొనాల్డ్ ట్రంప్ హంగామా:
మ్యాచ్ అనంతరం జరిగిన ముగింపు వేడుకలను యూఎస్ ప్రెసిడెంట్ డొనాల్డ్ ట్రంప్ ముందుండి నడిపించారు. ఆయన మ్యాచ్ రెఫరీలు, ఇండివిజ్యువల్ అవార్డు విజేతలు, రన్నరప్గా నిలిచిన అర్జెంటీనా ఆటగాళ్లకు మెడల్స్ అందించారు. చివరగా స్పెయిన్ జట్టుకు మెడల్స్ బహుకరించి, కెప్టెన్ రోడ్రి చేతికి బంగారు ప్రపంచకప్ ట్రోఫీని అందించారు. రోడ్రి ట్రోఫీని గాల్లోకి లేపడంతో స్పెయిన్ ప్లేయర్స్, అభిమానుల సంబరాలు న్యూజెర్సీ స్టేడియంలో అంబరాన్నంటాయి. 2010 తర్వాత స్పెయిన్ జట్టు మళ్లీ వరల్డ్ కప్ సాధించి సరికొత్త చరిత్ర లిఖించింది.
Calm. Composed. Champions.#FIFAWorldCup pic.twitter.com/gh9IVCLmba
— FIFA World Cup (@FIFAWorldCup) July 19, 2026
The Netherlands are the winners of the FIFA Fair Play Award presented by @mcdonalds 🤝🏆 pic.twitter.com/n1XirS0q9m
— FIFA World Cup (@FIFAWorldCup) July 19, 2026
