బాల్కొండ, వెలుగు : ఉత్తర తెలంగాణ జిల్లాల వరప్రదాయిని శ్రీరాంసాగర్ ప్రాజెక్ట్ సగం నిండింది. జూలై చివరి పది రోజుల్లో మహారాష్ట్ర ఎగువన కురిసిన వర్షాల వల్ల ఇన్ ఫ్లో పెరగడంతో ప్రాజెక్ట్ జలకళను సంతరించుకుంది. ఇప్పటివరకు 30.85 టీఎంసీల వరద నీరు వచ్చిందని ఇరిగేషన్ ఏఈ కొత్త రవి తెలిపారు. గత ఏడాదితో పోల్చితే ఈసారి 3.30 టీఎంసీల నీరు తక్కువగా ఉంది. ప్రస్తుతం ప్రాజెక్ట్లోకి 2150 క్యూసెక్కుల వరద వస్తోందని ఆఫీసర్లు చెప్పారు.
సాగు, తాగునీటికి కలిపి జూన్ ప్రారంభం నుంచి ఇప్పటివరకు 3.62 టీఎంసీల నీటిని విడుదల చేశారు. ప్రాజెక్ట్ పూర్తిస్థాయి నీటిమట్టం 1091.00 అడుగులు,80.50 టీఎంసీలు కాగా, సోమవారం సాయంత్రానికి 1078.20 అడుగులు,40.30 టీఎంసీల నీరు ఉంది. గత ఏడాది ఇదే సమయంలో 1079.50 అడుగులు,43.66 టీఎంసీల నీరు నిల్వ ఉందని అధికారులు పేర్కొన్నారు.
