న్యూఢిల్లీ: మహమ్మారి సెకండ్ వేవ్ భయాలు పోకముందే.. థర్డ్ వేవ్ ముప్పు పొంచి ఉందన్న నిపుణుల హెచ్చరికలు ఆందోళనకు గురిచేస్తున్నాయి. మూడో వేవ్లో పిల్లలపైనే ప్రభావం ఎక్కువగా ఉంటుందన్న వార్నింగ్లతో కొన్ని రాష్ట్రాల ప్రభుత్వాలు ముందే సిద్ధమైపోతున్నాయి. థర్డ్ వేవ్లో పిల్లలను కాపాడుకునేందుకు అన్ని ఏర్పాట్లు చేస్తున్నాయి. మహారాష్ట్ర, ఉత్తరప్రదేశ్, కర్నాటక, ఉత్తరాఖండ్ వంటి రాష్ట్రాలు చర్యలు మొదలుపెట్టేశాయి. పిల్లల కొవిడ్ టాస్క్ఫోర్స్ను ఏర్పాటు చేశాయి. పిల్లల కోసం ఐసీయూ బెడ్లు, కొవిడ్ కేర్ సెంటర్లను ఏర్పాటు చేసేందుకు సన్నాహాలు చేస్తున్నాయి.
యూపీలో ఐసీయూ బెడ్లు
రాష్ట్రంలోని ప్రతి జిల్లాలోనూ పిల్లల కోసం 100 ఐసీయూ బెడ్లను ఏర్పాటు చేసేందుకు యూపీ సర్కారు కసరత్తులు చేస్తోంది. అంతేగాకుండా 10 ఏళ్లలోపు పిల్లలున్న తల్లిదండ్రులందరికీ కరోనా వ్యాక్సిన్ వేయాలని నిర్ణయించినట్టు సీఎం యోగి ఆదిత్యనాథ్ ప్రకటించారు. థర్డ్ వేవ్కు ముందు నుంచే సిద్ధమవుతున్నట్టు చెప్పారు. 10 ఏళ్లలోపు పిల్లలున్న తల్లిదండ్రులకు వ్యాక్సిన్ వేయడం ద్వారా ఆ కుటుంబాలకు ‘రక్షణ కవచాన్ని’ ఏర్పాటు చేసినట్టు అవుతుందన్నారు. జర్నలిస్టులు, జ్యుడీషియల్ అధికారులు, వారి కుటుంబాలకు ఇప్పటిదాకా లక్నో, నోయిడాల్లోనే కరోనా టీకాలు వేస్తున్నారని, ఇకపై ప్రతి జిల్లాకూ ఆ కార్యక్రమాన్ని విస్తరిస్తామని తెలిపారు. ప్రతి మెడికల్ కాలేజీలోనూ పిల్లల కోసం 100 ఐసీయూ బెడ్ల ఏర్పాటుకు ఆదేశించామన్నారు. 300 ఆక్సిజన్ ప్లాంట్లను ఏర్పాటు చేస్తామన్నారు.
మహారాష్ట్రలో ఇలా..
పిల్లల్లో కరోనా వేవ్ను ఎదుర్కొనేందుకు ప్రత్యేకంగా టాస్క్ఫోర్స్ను ఏర్పాటు చేసింది మహారాష్ట్ర ప్రభుత్వం. పిల్లలకు అవసరమైన మందులు, పీడియాట్రిక్ వెంటిలేటర్లు, ఆక్సిజన్ మాస్కులు, ఇతర పరికరాలను సమకూర్చుకోవడంపై టాస్క్ఫోర్స్ పనిచేస్తుంది. పిల్లలకు కొవిడ్ కేర్ సెంటర్లనూ ఏర్పాటు చేస్తోంది. కరోనా ముప్పు ఎక్కువన్న ఆందోళనలతో ఇప్పటికే గర్భిణులకు ట్రీట్ చేసే ఆస్పత్రులను కొవిడ్ ఆస్పత్రులుగా మార్చొద్దని రాష్ట్ర ఆరోగ్య మంత్రి రాజేశ్ తోపె ఆదేశాలు ఇచ్చారు. రాష్ట్రమంతటా 150 ఆక్సిజన్ ప్లాంట్లను ఏర్పాటు చేస్తామని, ఇప్పటికే 38 ప్లాంట్ల ఏర్పాటు పనులు నడుస్తున్నాయి. రెమ్డిసివిర్, బ్లాక్ఫంగస్ మందులను ఇంపోర్ట్ చేసుకోవడానికి సిద్ధమవుతోంది. కర్నాటక కూడా కొవిడ్ టాస్క్ఫోర్స్ను ఏర్పాటు చేయాలని నిర్ణయించింది. కార్డియాలజిస్ట్ డాక్టర్ దేవి శెట్టి ఆధ్వర్యంలో ఆ టాస్క్ఫోర్స్ పనిచేస్తుంది. పెద్ద సంఖ్యలో కొవిడ్ కేర్ సెంటర్లను ఏర్పాటు చేయనుంది. అన్ని జిల్లాల్లోనూ కేంద్రాలను ఏర్పాటు చేసేందుకు కసరత్తులు మొదలుపెట్టింది. అదే బాటలో ఢిల్లీ, ఉత్తరాఖండ్లు నడుస్తున్నాయి.
పిల్లల్లో భారీగా పెరిగిన కేసులు
కరోనా ఫస్ట్వేవ్లో పిల్లలకు కరోనా సోకిన ఘటనలు తక్కువే అయినా.. సెకండ్వేవ్లో విపరీతంగా పెరుగుతున్నాయి. ఈ ఏడాది మార్చి 24 వరకు 10 ఏళ్ల లోపున్న 81,188 మందికి కరోనా సోకితే.. మే 6 నాటికి లక్షా 49 వేల 224కి పెరిగాయి. అంటే నెలన్నరలోనే 67 వేలకుపైగా కేసులు నమోదయ్యాయి. అదే 11 నుంచి 20 ఏళ్ల మధ్య వారిలో కేసులను చూస్తే.. మార్చి 24 వరకు 1.66 లక్షల కేసులొచ్చాయి. ఆ తర్వాత నెలన్నరలోనే రెట్టింపయ్యా యి. 3.38 లక్షలకు కేసులు పెరిగాయి. 21 నుంచి 30 ఏళ్ల మధ్య వారిలో 4.15 లక్షల నుంచి 8.67 లక్షలకు కరోనా కేసులు పెరిగాయి.
