- కేంద్రానికి సుప్రీంకోర్టు ఆదేశం
- కంటెంట్ ను నియంత్రించాలి
- అదే టైంలో భావప్రకటన స్వేచ్ఛనూ కాపాడాలని సూచన
న్యూఢిల్లీ: ఆన్ లైన్ లో యూజర్ జనరేటెడ్ కంటెంట్ (యూజీసీ)ను కట్టడి చేయాల్సిన అవసరం ఉందని, ఇందుకోసం సమర్థమైన మెకానిజం ఉండాలని సుప్రీంకోర్టు తెలిపింది. యూజీసీని నియంత్రించేందుకు నాలుగు వారాల్లోపు గైడ్ లైన్స్ రూపొందించాలని కేంద్ర ప్రభుత్వాన్ని ఆదేశించింది. ఇందుకోసం వివిధ వ్యక్తులు, మేధావుల అభిప్రాయం తీసుకోవాలని చీఫ్ జస్టిస్ ఆఫ్ ఇండియా సూర్యకాంత్, జస్టిస్ జోయ్ మాల్యా బాగ్చీతో కూడిన బెంచ్ సూచించింది.
కంటెంట్ నియంత్రణకు గైడ్ లైన్స్ రూపొందిస్తూనే భావప్రకటన స్వేచ్ఛ దెబ్బతినకుండా చూడాలని పేర్కొంది. ‘‘చాలామంది ఆన్ లైన్ లో చానెల్ క్రియేట్ చేస్తున్నారు తప్ప జవాబుదారీతనంగా ఉండడం లేదు. ఈ ధోరణి వింతగా ఉంది. ఆన్ లైన్ లో అప్ లోడ్ చేసిన కంటెంట్ విషయంలో బాధ్యత తీసుకోవాల్సిందే” అని బెంచ్ వ్యాఖ్యానించింది.
కాగా.. యూట్యూబ్ లో ‘ఇండియాస్ గాట్ ట్యాలెంట్’ షోలో హోస్ట్ రణ్ వీర్ గౌతమ్ అల్హాబాదియా గతంలో అసభ్యకరమైన వ్యాఖ్యలు చేశాడు. దీంతో అతనిపై పలువురు కేసు పెట్టారు. ఈ కేసుల నుంచి తనకు రక్షణ కల్పించాలని కోరుతూ అల్హాబాదియా పిటిషన్ వేశాడు. ఈ పిటిషన్ తో పాటు మరికొన్ని పిటిషన్లపైనా బెంచ్ గురువారం విచారణ జరిపింది. ఈ క్రమంలో బెంచ్ ఈ అంశంపై కీలక వ్యాఖ్యలు చేసింది.
ఏఐ, డీప్ ఫేక్ పై నిబంధనలు..
కేంద్ర సమాచార ప్రసార శాఖ తరపున అటార్నీ జనరల్ ఆర్.వెంకటరమణి వాదనలు వినిపించారు. ఇన్ఫర్మేషన్ టెక్నాలజీ రూల్స్ 2021 ప్రకారం కోడ్ ఆఫ్ ఎథిక్స్ కింద అసభ్యత, ఏఐ, డీప్ఫేక్స్ పై గైడ్ లైన్స్ రూపొందించాల్సిన అవసరం ఉందని ఆమె పేర్కొన్నారు. యూజర్ జనరేటెడ్ కంటెంట్ పై ప్రభుత్వం చర్యలు తీసుకోవాల్సిన అవసరం ఉందని సొలిసిటర్ జనరల్ తుషార్ మెహతా కూడా అన్నారు.
