హైదరాబాద్, వెలుగు: తహసీల్దార్లకు రిజిస్ట్రేషన్ అధికారాలు కల్పించిన సర్కారు.. తప్పు చేస్తే ఉద్యోగం నుంచి తొలగించే క్లాజ్ను పొందుపరిచింది. భూముల రికార్డులను అక్రమంగా దిద్దినా, మోసానికి పాల్పడినా, అక్రమంగా పాస్బుక్స్ జారీ చేసినా.. క్రిమినల్ కేసులు పెట్టడంతోపాటు సర్వీస్ నుంచి తొలగిస్తారు. ఇక ప్రభుత్వ భూములకు అక్రమంగా పట్టాదారు పాస్బుక్ జారీ అయినట్లు ఫిర్యాదులు అందితే.. కలెక్టర్ విచారణ జరిపి ఆ హక్కుపత్రాలను రద్దు చేయాలి. బాధ్యుడైన తహసీల్దార్ను డిస్మిస్ చేయాలి. భూమిని తిరిగి స్వాధీనం చేసుకుని, బాధ్యులపై క్రిమినల్ కేసులు పెట్టాలి.
కౌలుదారు లేనట్టేనా?
కొత్తగా ప్రవేశపెట్టిన ‘తెలంగాణ రైట్స్ ఇన్ ల్యాండ్ అండ్ పట్టాదార్ పాస్ బుక్స్–2020’ బిల్లులో కౌలుదారు (టెనెంట్) అనే పదాన్ని తొలగించారు. పహాణీలో కాస్తుదారు కాలమ్ తొలగించిన నేపథ్యంలోనే సర్కారు ఈ పదాన్ని తీసేసినట్టు తెలుస్తోంది. తెలంగాణ ఏర్పాటు తర్వాత అడాప్ట్ చేసుకున్న 1971 నాటి ‘ది తెలంగాణ రైట్స్ ఇన్ ల్యాండ్ అండ్ పట్టాదార్ పాస్ బుక్స్యాక్ట్’లో కౌలుదారు అనే పదానికి ‘లీజ్ అగ్రిమెంట్ ప్రకారం కౌలుదారు’ అనే నిర్వచనం కూడా ఇచ్చారు. కానీ బుధవారం పెట్టిన బిల్లులో ఈ పదాన్ని పూర్తిగా తీసేశారు.
బిల్లులో కొత్త పదాలివే..
1971 నాటి యాక్ట్తో పోలిస్తే తాజా బిల్లులో ‘ధరణి, స్పెషల్ ట్రిబ్యునల్, రిజిస్ట్రార్’ పదాలను చేర్చారు. రికార్డ్స్ఆఫ్ రైట్స్ నిర్వహించేందుకు ఏర్పాటు చేసిన డిజిటల్ ప్లాట్ఫామ్నే ‘ధరణి’ అని.. పెండింగ్ భూవివాదాలను పరిష్కరించేందుకు ఏర్పాటు చేసే ట్రిబ్యునల్స్ను స్పెషల్ ట్రిబ్యునల్స్ గా పేర్కొన్నారు.
