హైదరాబాద్: ఆదాయానికి మించిన ఆస్తులు కలిగి ఉన్నారనే ఆరోపణల నేపథ్యంలో ఇరిగేషన్ అండ్ క్యాడ్ శాఖ డిప్యూటీ ఎగ్జిక్యూటివ్ ఇంజినీర్ (డీఈఈ) ఆర్. సత్యనారాయణ (44) నివాసంతో పాటు ఆయనకు సంబంధించిన పలు ప్రాంతాల్లో అవినీతి నిరోధక శాఖ (ఏసీబీ) అధికారులు గురువారం ఏక కాలంలో సోదాలు నిర్వహించారు.
నాగర్‌కర్నూల్ జిల్లాలో విధులు నిర్వహిస్తున్న సత్యనారాయణపై ఆదాయానికి మించిన ఆస్తుల కేసు నమోదు కావడంతో 10 ఏసీబీ బృందాలు రంగంలోకి దిగాయి. హైదరాబాద్‌లోని బైరామల్‌గూడ, మాధవరం సెరెనిటీ గేటెడ్ కమ్యూనిటీలో ఉన్న ఆయన నివాసంతో పాటు మొత్తం 10 ప్రాంతాల్లో అధికారులు తనిఖీలు చేపట్టారు. ఈ సోదాల్లో ఇప్పటివరకు సుమారు రూ.7 కోట్ల విలువైన అక్రమ ఆస్తులను గుర్తించినట్లు ఏసీబీ డీఎస్పీ చలపతి వెల్లడించారు.
►ALSO READ | సజ్జనార్ తో సహా 21 మంది IPSలు బదిలీ
అధికారుల తనిఖీల్లో 25 ఎకరాల భూమికి సంబంధించిన ఆస్తి పత్రాలు, 50 తులాల బంగారు ఆభరణాలు, వివిధ ప్రాంతాల్లో నాలుగు ఇళ్లకు సంబంధించిన వివరాలు వెలుగులోకి వచ్చినట్లు తెలిపారు. ప్రభుత్వ లెక్కల ప్రకారం గుర్తించిన అక్రమ ఆస్తుల విలువ సుమారు రూ.7 కోట్లు కాగా, బహిరంగ మార్కెట్‌లో వీటి విలువ దాదాపు రూ.100 కోట్ల వరకు ఉండవచ్చని డీఎస్పీ చలపతి అభిప్రాయపడ్డారు. ఇంకా తొమ్మిది ప్రాంతాల్లో తనిఖీలు కొనసాగుతున్నాయని, సోదాలు పూర్తయిన అనంతరం పూర్తి వివరాలు వెల్లడిస్తామని ఏసీబీ అధికారులు తెలిపారు.
