- వెల్ఫేర్ స్కీమ్స్ అందకుండా ప్రభుత్వం చర్యలు
- ఇప్పటికే వంద మందికి పైగా రైతుల వివరాలు ఫ్రీజ్
హైదరాబాద్, వెలుగు: గంజాయి సాగు చేస్తున్న రైతుల భూములను రాష్ట్ర సర్కారు బ్లాక్లో పెడుతోంది. వారికి రైతుబంధుతో పాటు ఇతర వెల్ఫేర్ స్కీమ్స్ అందకుండా చర్యలు తీసుకుంటోంది. వివిధ జిల్లాల నుంచి ఎక్సైజ్ డిపార్ట్మెంట్ రైతుల వివరాలను అగ్రికల్చర్ డిపార్ట్మెంట్‌కు పంపుతోంది. ఒక్క సంగారెడ్డి జిల్లా నుంచే 21 మందికి రైతుబంధు ఆపేయాలని అధికారులు రిపోర్ట్ పంపారు. ఇతర జిల్లాల నుంచి మరో 80 మంది రైతుల వివరాలు వచ్చినట్లు ఆఫీసర్లు చెప్తున్నారు. గంజాయి సాగు చేస్తే ఆ రైతులకు రైతుబంధు, రైతు బీమా కట్ చేయడంతో పాటు ఇతర స్కీమ్స్ను నిలిపివేయాలని ఇటీవల సీఎం కేసీఆర్ఆదేశించడంతో అధికారులు ఆ దిశగా చర్యలు తీసుకుంటున్నారు.
రైతుబంధుకు బడ్జెట్ తగ్గుతుందా?
రైతుబంధుకు 2022 – 23 సంవత్సరానికి బడ్జెట్‌లో నిధులు తగ్గే సూచనలు కనిపిస్తున్నాయి. వ్యవసాయశాఖ పంపిన బడ్జెట్ ప్రపోజల్స్లో రూ.11,721 కోట్లు మాత్రమే చూపారు. రెండు సీజన్లలో ఎకరాకు5 వేల చొప్పున ఇవ్వాలంటే రూ.15 వేల కోట్లు అవసరం అవుతాయని ఆఫీసర్లు చెప్తున్నారు. ప్రభుత్వ సూచనల ప్రకారమే అధికారులు బడ్జెట్ ప్రపోజల్స్ పంపినట్లు తెలుస్తోంది. ప్రస్తుత ఆర్థిక సంవత్సరం కంటే దాదాపు రూ.3 వేల కోట్లు తగ్గించడంతో రైతుబంధుపై ఏమైనా నిర్ణయం ఉంటుందా అని అధికార వర్గాల్లో చర్చ జరుగుతోంది. రుణమాఫీకి రూ.2,905 కోట్లు ప్రతిపాదించినట్లు తెలిసింది.
