పవర్ స్టార్, ఏపీ డిప్యూటీ సీఎం పవన్ కళ్యాణ్ అభిమానులకు, 'OG' (They Call Him OG) చిత్ర నిర్మాణ సంస్థకు తెలంగాణ హైకోర్టులో ఊహించని ఎదురుదెబ్బ తగిలింది. సినిమా టికెట్ ధరలను పెంచుతూ, అలాగే ప్రత్యేక ప్రదర్శనలకు అనుమతిస్తూ రాష్ట్ర ప్రభుత్వం జారీ చేసిన ఉత్తర్వులపై తెలంగాణ హైకోర్టు స్టే విధించింది.
టికెట్ ధరలు, బెనిఫిట్ షోలపై సస్పెన్షన్
'OG' సినిమా విడుదలకు ముందు భారీ ఓపెనింగ్స్ సాధించే ఉద్దేశంతో చిత్ర నిర్మాతలు DVV ఎంటర్‌టైన్‌మెంట్స్ తెలంగాణ ప్రభుత్వానికి టికెట్ ధరల పెంపు, బెనిఫిట్ షోల కోసం దరఖాస్తు చేసుకున్నారు. నిర్మాతల అభ్యర్థన మేరకు తెలంగాణ ప్రభుత్వం సెప్టెంబర్ 19, 2025న ఒక అధికారిక మెమో (GO) జారీ చేసింది. ఈ మెమో ప్రకారం. సెప్టెంబర్ 24న ఒక రోజు ముందుగా రాత్రి 9 గంటలకు ప్రత్యేక ప్రీమియర్ షోకు అనుమతి ఇచ్చారు. ఈ షో టికెట్ ధర రూ. 800గా నిర్ణయించారు. సెప్టెంబర్ 25 నుంచి అక్టోబర్ 4 వరకు (మొదటి 10 రోజులు) సాధారణ షోలలో కూడా టికెట్ ధరలు తాత్కాలికంగా పెంచేందుకు అనుమతి లభించింది. సింగిల్ స్క్రీన్లలో రూ.100 వరకు, మల్టీప్లెక్స్‌లలో రూ. 150 వరకు ధరలు పెంచుకునే వీలు కల్పించారు.
ALSO READ : OG మూవీపై Book My Show సంచలన ప్రకటన
అయితే, ప్రభుత్వ నిర్ణయాన్ని సవాలు చేస్తూ కొందరు హైకోర్టులో పిటిషన్ దాఖలు చేశారు. ముఖ్యంగా, 'పుష్ప 2' ప్రీమియర్ షో సమయంలో జరిగిన విషాదకర ఘటన నేపథ్యంలో, ప్రభుత్వం మళ్లీ బెనిఫిట్ షోలకు, అధిక ధరల పెంపుకు అనుమతి ఇవ్వడంపై అభ్యంతరాలు వ్యక్తమయ్యాయి.
ఈ పిటిషన్లను విచారించిన తెలంగాణ హైకోర్టు, చిత్ర నిర్మాతల కోసం ప్రేక్షకులకు అధిక భారాన్ని మోపే విధంగా ప్రభుత్వం జారీ చేసిన ఉత్తర్వులను తక్షణమే సస్పెండ్ చేస్తూ మధ్యంతర ఉత్తర్వులు జారీ చేసింది. దీంతో, 'OG' సినిమాకు ఇప్పుడు తాత్కాలికంగా పెంచిన ధరలు, ప్రత్యేక షోల అనుమతి అమలు చేయడం సాధ్యపడదు.
ఈ తాజా కోర్టు ఉత్తర్వులతో, 'OG' సినిమా రెగ్యులర్ టికెట్ ధరలకే విడుదల కానుంది. చిత్ర నిర్మాతలు తమ భారీ పెట్టుబడిని తిరిగి పొందడానికి ఇది కొంత ప్రతికూల అంశంగా మారగా, సాధారణ ప్రేక్షకులకు మాత్రం ఇది ఊరటనిచ్చినట్లయింది. ఈ కేసు తదుపరి విచారణలో తుది తీర్పు ఏం వస్తుందనే దానిపై సినీ వర్గాలు, అభిమానులు ఉత్కంఠగా ఎదురుచూస్తున్నారు.
