- పైలట్ ప్రాజెక్టుగా ములుగు, హనుమకొండ బస్టాండ్లో ఏర్పాటు
- సహేలి పోస్టర్ ఆవిష్కరించిన మంత్రులు సీతక్క, పొన్నం ప్రభాకర్
హైదరాబాద్, వెలుగు : దేశంలోనే తొలిసారిగా మన రాష్ట్రంలోని ఆర్టీసీ బస్టాండ్, బస్ డిపోల్లో శానిటరీ నాప్కిన్ వెండింగ్ మిషన్లు అందుబాటులోకి రాబోతున్నాయి. నెలసరి సమస్యలు ఎదుర్కొంటున్న మహిళా ప్రయాణికుల సౌలభ్యం కోసం వినూత్న ఆలోచనతో వీటిని ఏర్పాటు చేయబోతున్నారు. సహేలీ సంస్థ, రవాణా శాఖ, ఆర్టీసీల సహకారంతో పది రోజుల్లో అందుబాటులోకి రానున్నాయి. ఈ మేరకు సహేలీ స్వచ్ఛంద సంస్థ ఆర్టీసీతో ఒప్పందం కుదుర్చుకున్నది.
పైలట్ప్రాజెక్టుగా హన్మకొండ, ములుగు బస్టాండ్లలో శానిటరీ నాప్కిన్ మిషన్లను ప్రారంభించేందుకు ఏర్పాట్లు చేస్తున్నారు. ఆ తర్వాత హుస్నాబాద్, హైదరాబాద్ లో ఏర్పాటు చేయనున్నారు. విజయవంతమైతే రాష్ట్రవ్యాప్తంగా అన్ని బస్టాండ్లు, డిపోలకు విస్తరించేలా ప్రణాళిక రూపొందించారు. నాప్కిన్ మిషన్లను ఏర్పాటు చేస్తున్న సహేలి స్వచ్ఛంద సంస్థ పోస్టర్ను శుక్రవారం మంత్రులు సీతక్క, పొన్నం ప్రభాకర్ఆవిష్కరించారు.
సహేలితో మహిళల ఆరోగ్యానికి కృషి
మంత్రి సీతక్క మాట్లాడుతూ.. మహిళల కోసం సహేలి అనే సంస్థ సహకారంతో ఆర్టీసీ బస్టాండ్లలో నాప్కిన్ల మిషన్ ఏర్పాటు చేయబోతున్నట్లు ప్రకటించారు. సహేలి సంస్థ ద్వారా మహిళల ఆరోగ్యానికి కృషి చేస్తామన్నారు. బస్సులలో ప్రయాణించే మహిళలు, అమ్మాయిలకు సడన్ గా నెలసరి సమస్యలు వస్తే ప్యాడ్స్ దొరకక ఇబ్బందులు పడతారని, దీన్ని దృష్టిలో పెట్టుకొని నాప్కిన్మిషన్లను బస్టాండ్ లో ఏర్పాటు చేసేందుకు సహేలి సంస్థ ముందుకు రావడం అభినందనీయమన్నారు.
మంత్రి పొన్నం ప్రభాకర్ సహకారంతో ఆర్టీసీ బస్టాండ్లలో ఈ మిషన్లను ఏర్పాటు చేస్తున్నామని చెప్పారు. నెలసరితో మహిళా ప్రయాణికులు ఇబ్బందులు పడొద్దన్న ఉద్దేశంతో ప్రయోగాత్మకంగా ములుగు, హనుమకొండలో బస్టాండ్లలో ఏర్పాటు చేస్తున్నామని మంత్రి సీతక్క పేర్కొన్నారు. ఈ మిషన్ల ఏర్పాటుకు ముందుకొచ్చిన సహేలి సంస్థ వ్యవస్థాపకురాలు కొమ్ము అనుపమకు అభినందనలు తెలిపారు.
