మెదక్ జిల్లాలో రెండో విడత లెక్క తేలింది

• విత్ డ్రాలు పూర్తి
•  9న మూడో విడత ఫైనల్ లిస్ట్
•  జోరందుకున్న ప్రచారాలు

మెదక్, సిద్దిపేట, సంగారెడ్డి, వెలుగు: నామినేషన్ల ఉప సంహరణ ప్రక్రియ ముగియడంతో రెండో విడతలో సర్పంచ్ స్థానాలకు, వార్డ్ మెంబర్ స్థానాలకు మిగిలిన అభ్యర్థుల లెక్క తేలింది. పలు సర్పంచ్, వార్డ్ మెంబర్ స్థానాలు ఏకగ్రీవం కాగా మిగిలిన స్థానాలకు ఎన్నికలు జరుగనున్నాయి. 

సిద్దిపేట జిల్లాలో..

రెండో విడత పంచాయతీ ఎన్నికల్లో సిద్దిపేట  రెవెన్యూ డివిజన్ పరిధిలోని చిన్నకోడూరు, అక్బర్ పేట భూంపల్లి, దుబ్బాక, మిరుదొడ్డి, నంగునూరు, నారాయణరావుపేట సిద్దిపేట రూరల్, సిద్దిపేట అర్బన్, తొగుట, హుస్నాబాద్ డివిజన్ పరిధిలోని బెజ్జంకి మండలాల పరిధిలోని 182 పంచాయతీలు, 1,644 వార్డు స్థానాలకు ఎన్నికలు జరుగుతుండగా సర్పంచ్ స్థానాలకు 694 మంది, వార్డు స్థానాలకు 3,917 మంది అభ్యర్థులు బరిలో మిగిలారు. 10 సర్పంచ్ స్థానాలు, 278 వార్డు మెంబర్ స్థానాలు ఏకగ్రీవమయ్యాయి.  

నంగునూరు మండలం ఖాతా సర్పంచ్ గా పులూరు సోని మహేశ్, సంతోష్ నగర్ సర్పంచ్ గా బానోతు సరోజని కిషన్, చిన్నకోడూరు మండలం రామంచ సర్పంచ్ గా ఎర్ర భవానీ నవీన్ కుమార్, మిరుదొడ్డి మండలం తాళ్లపల్లి సర్పంచ్ గా నీల ప్రభాకర్, అక్బర్ పేట భూంపల్లి మండలం జంగపల్లి సర్పంచ్ గా పి.లావణ్య, అల్మాజీ పూర్ సర్పంచ్ గా ఎన్.పద్మ మల్లేశం, బెజ్జంకి మండలం నర్సింలు పల్లి సర్పంచ్ గా జె.రమేశ్, దుబ్బాక మండలం పోతారం సర్పంచ్ గా సల్కం రేణుక మల్లేశ్‌‌యాదవ్, వెంకటగిరి తండా సర్పంచ్ గా బానోతు రంజ ఎన్నికయ్యారు. 

సిద్దిపేట అర్బన్ మండలం పండవ పురం సర్పంచ్ స్థానానికి ఒక్క నామినేషన్ దాఖలు కాగా ఇక్కడ పదవికి వేలం నిర్వహిస్తుండగా పోలీసులు కేసు నమోదు చేయడంతో  ఏకగ్రీవ ఎన్నికపై  ప్రకటన పెండింగ్ లో పెట్టారు. పోలీస్ కేసు నేపథ్యంలో ఏకగ్రీవ ఎన్నిక ప్రకటన చేయాలా వద్దా అనే అంశంపై కలెక్టర్ హైమావతి పరిశీలన జరుపుతుండగా కాంగ్రెస్ నాయకులు సైతం కలెక్టర్ కు ఫిర్యాదు చేశారు.

మెదక్ జిల్లాలో..

రెండో విడతలో మెదక్ జిల్లాలో 8 మండలాల పరిధిలో ఉన్న 149 గ్రామ పంచాయతీ సర్పంచ్ స్థానాలకు, 1,290 వార్డ్ మెంబర్ స్థానాలకు ఎన్నికలు జరుగుతున్నాయి. ఇందులో 7 సర్పంచ్ స్థానాలు, 254 వార్డ్ మెంబర్ స్థానాలు ఏకగ్రీవమయ్యాయి. ఇవిపోను 142 సర్పంచ్, 1,035 వార్డ్ మెంబర్ స్థానాలకు ఎన్నికలు జరగనున్నాయి. వెల్దుర్తి మండలం బస్వాపూర్, నగరం, శౌకత్ పల్లి, నంద గోకుల్, మెదక్ మండలం మల్కా పూర్, చిన్న శంకరంపేట మండలం గవల పల్లి తండా, తుర్కల మందాపూర్ తండా, సంగాయపల్లి సర్పంచ్ పదవులు ఏకగ్రీవమయ్యాయి. 

సంగారెడ్డి జిల్లాలో..

సంగారెడ్డి జిల్లాలో రెండో విడతలో మొత్తం 243 గ్రామ పంచాయతీలు, 2,164 వార్డు స్థానాలకు అధికారులు ఎన్నికల ఏర్పాట్లు చేయగా ఇందులో 14 పంచాయతీలు, 222 వార్డు స్థానాలు ఏకగ్రీవమయ్యాయి. మిగతా 229 సర్పంచ్ స్థానాలకు 649 మంది అభ్యర్థులు, 1,941 వార్డు స్థానాలకు 4,505 మంది క్యాండిడేట్లు బరిలో నిలిచారు. అభ్యర్థులకు పార్టీలు మద్దతు ఇస్తున్నప్పటికీ ప్రధానంగా వారంతా సొంత మేనిఫెస్టోలతో ప్రచారం చేసుకుంటున్నారు. 

ఒక్కో పంచాయతీ నుంచి దాదాపు ముగ్గురేసి అభ్యర్థులు పోటీపడుతుండగా ఎన్నికల హామీలు ప్రధాన అంశాలుగా మారాయి. మూడో విడత ఎన్నికల నామినేషన్ ఘట్టం పూర్తికాగా ఈనెల 9న అధికారులు పోటీలో ఉండే అభ్యర్థుల తుది జాబితాను ప్రకటించనున్నారు.

మెదక్​ జిల్లా

మండలం               జీపీలు    అభ్యర్థులు    వార్డులు    అభ్యర్థులు
అల్లాదుర్గం                16          56                  152              283
చేగుంట                     25         114                  226              529
నార్సింగి                     9          63                    80                394
మనోహరాబాద్         17          69                   148               349
తూప్రాన్                    14         42                    114               204
రామాయంపేట        16         52                     138              283
 నిజాంపేట               16         70                     142              302
మెదక్                        21         91                     178              580
చిన్నశంకరంపేట    31        40                      264              279
మొత్తం                      147     541                    1,034            2,920

సంగారెడ్డి జిల్లా..

మండలం    జీపీలు    అభ్యర్థులు    వార్డులు    అభ్యర్థులు
అందోల్          24            68                    211           474
చౌటకూర్       14            44                    125            311
పుల్కల్           15           47                     145            372
వట్ పల్లి         21            62                     177            384
రాయికోడ్        31            72                     235            516
ఝరాసంగం   31            76                     241            563
జహీరాబాద్     22            64                     201           466
మొగుడంపల్లి  18           60                     158            410
కోహిర్                23          70                      210           497
మునిపల్లి          30           79                     238            512
 మొత్తం            229         649                  1,941         4,505

సిద్దిపేట జిల్లా..

మండలం                        జీపీలు    అభ్యర్థులు    వార్డులు    అభ్యర్థులు
సిద్దిపేట రూరల్               15            73                    140           361
సిద్దిపేట అర్బన్               12            46                    116            321
నారాయణరావుపేట         11            50                     96            233
చిన్నకోడూరు                    28            99                    256           613
నంగునూరు                       25           86                     220           483
దుబ్బాక                             21           72                     188            422
మిరుదొడ్డి                          10‌‌            48                     98              283
అక్బర్ పేట                      19            76                     168            385
తొగుట                              17            58                      152            365
బెజ్జంకి                              24            86                      168            451
మొత్తం                           182          694                      1644         3917