హైదరాబాద్, వెలుగు: రాష్ట్రంలో ఎండల తీవ్రత రోజురోజుకు పెరుగుతోంది. మంగళవారం అన్ని జిల్లాల్లోనూ 40 డిగ్రీలపైనే టెంపరేచర్లు నమోదయ్యాయి. ఆరు జిల్లాల్లో 43 డిగ్రీలకుపైగానే టెంపరేచర్లు రికార్డయ్యాయి. 17 జిల్లాల్లో 42 నుంచి 43 మధ్య, 9 జిల్లాల్లో 41 నుంచి 42 మధ్య టెంపరేచర్లు నమోదు కాగా.. వరంగల్ జిల్లాలో 40 డిగ్రీల టెంపరేచర్ రికార్డయింది. అత్యధికంగా నిర్మల్ జిల్లా నర్సాపూర్లో 43.5 డిగ్రీల ఉష్ణోగ్రత నమోదైంది.
జగిత్యాల జిల్లాలోని జైన, నల్గొండ జిల్లా మాడ్గులపల్లిలో 43.4, ఖమ్మం జిల్లా నేలకొండపల్లిలో 43.3, జోగుళాంబ గద్వాల జిల్లా అయిజలో 43.2, ఆదిలాబాద్ జిల్లా అర్లిటిలో 43 డిగ్రీల ఉష్ణోగ్రతలు రికార్డు అయ్యాయి. ఇక రాబోయే మూడు రోజుల పాటు ఎండల తీవ్రత ఎక్కువగా ఉంటుందని, ఉక్కపోత, వడగాలుల ప్రభావం తీవ్రంగా ఉంటుందని వాతావరణ శాఖ హెచ్చరించింది. ఈ మేరకు 22 జిల్లాలకు ఆరెంజ్ అలర్ట్ జారీ చేసింది.
