స్కీంలు.. పొదుపు సంస్థలు..మా దగ్గర పెట్టుబడి పెట్టండి అధిక లాభాలు పొందండి.. అని చెప్పడంతోనే చాలామంది టెంప్ట్ అవుతారు. తీరా వారు అనుకున్న టార్గెట్ రీచ్ కావడంతోనే బోర్డ్ తిప్పేసి చెక్కేస్తారు. ఆ తరువాత బాధితులు మేల్కొని పోలీసులను ఆశ్రయిస్తారు. ఇక చట్టానికి దొరికిన తరువాత వారు డబ్బును లెక్కేసిన చేతులతోనే జైలు ఊచలు లెక్కపెట్టాల్సిన పరిస్థితి. తాజాగా థాయ్ లాండ్ లో ఓ దంపతులు ఇలానే చేయడంతో... అక్కడి కోర్టు వారికి వేల సంవత్సరాలు శిక్ష విధించింది.
12, 640 ఏళ్లు జైలు శిక్ష
థాయ్ లాండ్ లో తప్పు చేస్తే శిక్షలు ఘోరంగా ఉంటాయి. నేరాలు చేసిన వాళ్లకి అక్కడ కోర్టులు కఠిన శిక్షలు విధిస్తాయి. తాజాగా ఓ దంపతులకు కోర్టు .. సంచలన శిక్ష వేస్తున్నట్లు తీర్పునిచ్చింది. ఆన్లైన్ పోంజి స్కీం పేరుతో సోషల్ మీడియాలో మోసానికి పాల్పడిన భార్యభర్తలకు ఒక్కొక్కరికి 12,640 ఏళ్ల జైలు శిక్ష విధించింది.
2019లో పోంజి మోసం
వాంటనీ తిప్పావెత్, మేతి చిన్ఫా పాంజీ దందపతులు..తమ దగ్గర పొదుపు చేస్తే ఎన్నో రెట్లు అదనంగా సొమ్ములు ఇస్తామని జనాలను మోసగించారు. దీంతో వారికి థాయ్ లాండ్ క్రిమినల్ కోర్టు శిక్ష విధించింది. వీరు 2019లో పోంజి మోసానికి తెర లేపారు.అయితే ఈ స్కామ్ లో ఈ దంపతులతో పాటు మరో ఏడుగురు వ్యక్తులు ప్రముఖ పాత్రను పోషించారు. తమ దగ్గర డబ్బు పొదుపు చేస్తే వాటిపై 96 శాతం రిటర్న్స్ ఇస్తామని ప్రకటించారు. స్వల్ప కాలంలో మిలియనీర్లు కావాలంటే తమ పోంజి పథకంలో చేరాలంటూ ఫేస్ బుక్, ఇతర సోషల్ మీడియాల్లో ప్రచారం చేశారు. ఈ మేరకు వీరు కొన్ని నకిలీ వీడియోలను ఆన్ లైన్ లో ఉంచి ప్రలోభ పెట్టేవారు. ఈ విధంగా వచ్చిన డబ్బుతో తాము ఒక జ్యూయెలరీ షాప్ ను కూడా కొనుగోలు చేశానంటూ రకరకాల నగలు ధరిస్తూ వాంటనీ ఆ వీడియోలో చూపిస్తూ రెచ్చగొట్టేవారు.
51.3 మిలియన్ డాలర్లు సేకరణ
నిజానికి తన ఆఫీస్ లోని రూమ్నే నగల షాప్గా భ్రమింపజేసేలా వారు నకిలీ వీడియోను తయారు చేశారు. దీంతో 2500 మందికి పైగా వారి పథకంలో పెట్టుబడి పెట్టారు. సుమారు 51.3 మిలియన్ డాలర్లు సేకరించి దంపతులు బోర్డు తిప్పేశారు. దీంతో వీరిపై కేసు నమోదైంది. విచారణలో థాయ్ లాండ్ క్రిమినల్ కోర్టు వీరికి 12,640 ఏళ్ల జైలు శిక్ష విధిస్తూ తీర్పు వెల్లడించింది. అయితే నిందితులు నేరాన్ని అంగీకరించడంతో జైలు శిక్షను 5,056 ఏళ్లకు తగ్గించారు. నిజానికి వారికి అన్ని ఏళ్ల జైలు శిక్ష విధించినప్పటికీ థాయ్ లాండ్ చట్టం ప్రకారం దంపతులు ఒక్కొక్కరు 20 ఏళ్లు మాత్రమే ఆ దేశం జైలులో ఉంటారని ఒక అధికారి పేర్కొన్నారు.
