దేశవ్యాప్తంగా 12 యూనివర్శిటీలు క్లోజ్.. లోక్ సభలో వెల్లడించిన కేంద్రం

న్యూఢిల్లీ: 2014 నుంచి 2024 వరకు మొత్తం పదేళ్లలో దేశ వ్యాప్తంగా 12 ఫేక్ యూనివర్శిటీలు మూసివేయబడ్డాయని కేంద్ర విద్యా శాఖ సహాయ మంత్రి సుకాంత మజుందార్ తెలిపారు. దేశంలోని నకిలీ యూనిర్శిటీలపై కేంద్ర ప్రభుత్వం ఎలాంటి చర్యలు తీసుకుంటుందని లోక్ సభలో ప్రశ్నత్తోరాల సమయంలో ఓ సభ్యుడు ప్రశ్నించాడు. ఈ ప్రశ్నకు మంత్రి సుకాంత మజుందార్ ఆన్సర్ ఇచ్చారు. 2014 నుంచి 2024 వరకు దేశంలోని వివిధ రాష్ట్రాల్లో యూజీసీ మొత్తం 21 నకిలీ యూనివర్శిటీలను గుర్తించిందని ఆయన తెలిపారు. ఇందులో 12 వర్శిటీలపై చర్యలు తీసుకుని మూసివేశామని పేర్కొన్నారు.

Also Read :- ఈ నెల 17 వరకూ హైదరాబాద్ నుమాయిష్

మిగిలిన వాటికి నోటీసులు జారీ చేశామని తెలిపారు. విద్యార్థులను మోసం చేయడం, తప్పుదారి పట్టించడంలో పాల్గొన్న వారిపై చట్టపరమైన చర్యలు తీసుకోవాలని ఈ సందర్భంగా రాష్ట్ర ప్రభుత్వాలకు సూచించారు. అలాగే.. తమ రాష్ట్రాల్లో ఉన్న నకిలీ వర్శిటీల వివరాలను యూజీసీ, కేంద్ర ప్రభుత్వంతో పంచుకోవాలని కోరారు. విద్యార్థులు మోసపోకుండా ఫేక్ వర్శిటీల వివరాలను సోషల్ మీడియా, పబ్లిక్ డొమైన్లలో అందుబాటులో ఉంచాలని పేర్కొన్నారు. కేంద్రం మూసివేసిన 12 యూనివర్శిటీల్లో 2 విశ్వవిద్యాయాలు పొరుగు రాష్ట్రం ఆంధ్రప్రదేశ్ లోనే ఉండటం గమనార్హం.