- వెలుగు కథనానికి స్పందన
- పేషెంట్ మృతిపై రిపోర్టు ఇవ్వాలని కలెక్టర్కు ఆదేశాలు
- హుటాహుటిన సీఎంఓకు రిపోర్టు పంపిన అధికారులు
మంచిర్యాల, వెలుగు : మంచిర్యాల జిల్లాలో అంబులెన్స్ల కమీషన్ దందాపై ‘అత్యాశతో ఆయువు తీస్తుండ్రు’ అని సోమవారం 'వెలుగు'లో పబ్లిష్ అయిన స్టోరీపై తెలంగాణ సీఎంఓ స్పందించింది. దీనిపై వెంటనే రిపోర్టు ఇవ్వాలని కలెక్టర్కు సంతోష్కు ఆదేశాలు వచ్చాయి. ఈ మేరకు డీఎంహెచ్ఓ డాక్టర్ సుబ్బారాయుడు హుటాహుటిన కలెక్టర్కు రిపోర్టు అందజేయగా, సీఎంవోకు పంపినట్టు సమాచారం.
పేషెంట్ మృతిపై రిపోర్టు...
అంబులెన్స్ డ్రైవర్ కమీషన్ కక్కుర్తి కారణంగా ఇటీవల ఒక పేషెంట్ మృతి చెందిన ఘటనపై పూర్తి వివరాలతో సీఎంవోకు రిపోర్టు సమర్పించారు. మార్చి 29న లక్సెట్టిపేటకు చెందిన సింధూజ యాక్సిడెంట్తో తీవ్రంగా గాయపడ్డది. కుటుంబసభ్యులు అంబులెన్స్లో మంచిర్యాల గవర్నమెంట్ హాస్పిటల్కు తీసుకొచ్చారు. అక్కడి నుంచి మరో ఆస్పత్రికి తరలించే క్రమంలో అంబులెన్స్ ఓనర్ కమ్ డ్రైవర్ సాగర్ కు 30 నుంచి 40 శాతం కమీషన్ ఇచ్చే ఆస్పత్రికి తీసుకెళ్లాడు.
డాక్టర్లు ట్రీట్మెంట్ చేస్తుండగానే సింధూజ బ్రెయిన్ డెడ్ అయింది. అరగంట ముందు వస్తే ఈ పరిస్థితి వచ్చేది కాదని డాక్టర్లు చెప్పారు. డ్రైవర్ అత్యాశ కారణంగా పేషెంట్ చనిపోయిందని కుటుంబసభ్యులు పోలీసులకు ఫిర్యాదు చేయగా.. నిందితుడిని రిమాండ్కు పంపారు. ఈ ఘటన పై పూర్తి అధికారులు సీఎంఓకు రిపోర్టు పంపారు.
అంబులెన్స్ల కంట్రోల్పై ఫోకస్....
ఈ ఘటనతో అంబులెన్స్ల దందాను కంట్రోల్ చేయడంపై సీఎంవో ఫోకస్ పెట్టినట్టు తెలుస్తోంది. ఇప్పటివరకు వీటిని ఏ డిపార్ట్మెంట్ కంట్రోల్ చేస్తుందన్నది అధికారులకే క్లారిటీ లేకపోవడం గమనార్హం. అంబులెన్స్లకు పర్మిషన్లు ఇస్తున్న ఆర్టీఏ అధికారులు ఆ తర్వాత వాటి ఫిట్నెస్ గురించి కానీ, ఇతర విషయాల గురించి కానీ పట్టించుకోవడం లేదు. మెడికల్ అండ్ హెల్త్ డిపార్ట్మెంట్ అధికారులు తమకు ఎలాంటి సంబంధం లేదంటున్నారు. బాధితులు ఫిర్యాదు చేసినప్పుడు పోలీసులు కేసులు ఫైల్ చేస్తున్నారు.
అంబులెన్స్లలో అసవరమైన పరికరాలు ఉన్నాయా? అత్యవసర పరిస్థితుల్లో పేషెంట్లకు కనీసం ఆక్సిజన్ పెట్టేంత నైపుణ్యం డ్రైవర్లకు ఉందా? లేదా? అన్నది ఎవరూ పట్టించుకోవడం లేదు. మంచిర్యాల నుంచి పేషెంట్లను కరీంనగర్, వరంగల్, హైదరాబాద్ తీసుకెళ్తుంటారు. ప్రయాణానికి కనీసం 5 గంటల టైమ్ పడుతుంది. అక్కడికి చేరేంత వరకు దేవుడిపై భారం వేసి ఊరుకుంటున్నారు. వెంటిలేటర్ అంబులెన్స్లలో మాత్రం ప్రైవేట్ హాస్పిటళ్లలో పనిచేసే సిబ్బందిని పేషెంట్ల వెంట తీసుకెళ్తున్నారు. అధికారుల కంట్రోల్ లేకపోవడంతో డ్రైవింగ్ వస్తే చాలు అంబులెన్స్ మెయింటెన్ చేయవచ్చన్న పరిస్థితి ఉంది.
108లో ఉండే టెక్నీషియన్ల మాదిరిగా ప్రైవేట్ అంబులెన్స్ల డ్రైవర్లకు అత్యవసర పరిస్థితుల్లో తీసుకోవాల్సిన చర్యలపై ట్రెయినింగ్ ఇవ్వాలని సూచిస్తున్నారు. పూర్తిస్థాయి పర్యవేక్షణ బాధ్యతలను 108 ఏజెన్సీకి కానీ, మెడికల్ అండ్ హెల్త్ డిపార్ట్మెంట్కు గానీ అప్పగించడం మేలంటున్నారు. ప్రస్తుతం అంబులెన్స్ నిర్వాహకులంతా సిండికేట్ అయి ఇష్టారీతిన రెంట్ వసూలు చేస్తున్నారు. అంబులెన్స్లకు పోటీపడి కమీషన్లు ఇస్తున్న హాస్పిటళ్లను గుర్తించి చర్యలు తీసుకోవాల్సిన అవసరముంది.
