బెంగళూరు: సినీ నటి ఆషికా రంగనాథ్ మామ కూతురు అచల్ (22) ఆత్మహత్య చేసుకుని చనిపోయింది. హసన్ ప్రాంతానికి చెందిన అచల్ బెంగళూరులోని పాండురంగ నగర్లో ఉన్న బందువుల ఇంట్లో ఆత్మహత్యకు పాల్పడింది. నవంబర్ 22న జరిగిన ఈ ఘటన ఆలస్యంగా వెలుగులోకి వచ్చింది. పుట్టెనహళ్లి పోలీస్ స్టేషన్ పరిధిలో ఈ ఘటన జరిగింది. హసన్ జిల్లాకు చెందిన అచల్ ఇటీవలే తన ఇంజనీరింగ్ డిగ్రీ పూర్తి చేసి ఉద్యోగంలో చేరడానికి బెంగళూరుకు వచ్చింది. ఇదే సమయంలో.. ఆమెకు తన దూరపు బంధువు మయాంక్‌తో పరిచయం ఏర్పడింది. ఈ పరిచయం కాస్తా స్నేహంగా మారింది. కానీ.. ఈ స్నేహమే ఆమెను ఆపదలోకి నెట్టేస్తుందని అచల్ కలలో కూడా ఊహించలేదు.
కూతురి ఆత్మహత్యపై.. అచల్ తల్లి మాట్లాడుతూ.. మయాంక్ తన కూతురితో స్నేహంగా ఉండేవాడని, కానీ కొన్ని రోజులకు అతను తన పాడు బుద్ధి బయటపెట్టాడని.. తన కూతురితో శారీరక సంబంధం కోసం పట్టుబట్టాడని అచల్ తల్లి ఆవేదన వ్యక్తం చేసింది. అందుకు తన కూతురు ఒప్పుకోకపోవడంతో.. తన కూతురిపై దాడి చేసి, మానసికంగా హింసించాడని ఆమె కన్నీరుమున్నీరైంది. రాత్రింబవళ్లు ఫోన్ చేసి, సందేశాలు పంపి బెదిరించాడని, ఇదంతా చూసి విసిగిపోయిన అచల్ నవంబర్ 22న పాండురంగ నగర్‌లోని తమ బంధువుల ఇంట్లో ఉరి వేసుకుని ఆత్మహత్య చేసుకుందని అచల్ తల్లి తీవ్ర ఆవేదన వ్యక్తం చేసింది. అచల్ మృతదేహాన్ని పోస్టుమార్టానికి తరలించిన పోలీసులు పుట్టెనహళ్లి పోలీస్ స్టేషన్‌లో అసహజ మరణంగా కేసు నమోదు చేసుకున్నారు.
అచల్ మొబైల్ ఫోన్‌లో ఆమెను వేధిస్తూ మెసేజ్లు.. వందల కాల్స్, బెదిరింపు సందేశాలు.. శారీరక సంబంధం కోరుతూ చాట్‌లు చూసిన ఆమె కుటుంబం పోలీస్ స్టేషన్‌లో మయాంక్పై ఫిర్యాదు చేసింది. ఈ కేసులో.. ఐపీసీ సెక్షన్లు 306 (ఆత్మహత్యకు ప్రేరేపించడం), 354A (లైంగిక వేధింపులు), 506 (నేరపూరిత బెదిరింపు) కింద పోలీసులు ఎఫ్ఐఆర్ నమోదు చేశారు. ఈ ఘటన జరిగి 10 రోజులు గడిచినా.. నిందితుడు మయాంక్, అతని తల్లి మైనా ఇద్దరూ పరారీలో ఉన్నారని పోలీసులు చెబుతుండటంపై అచల్ కుటుంబం తీవ్ర అసంతృప్తి వ్యక్తం చేసింది. తమ కూతురి ఆత్మహత్యకు కారణమైన వారిని వెంటనే అరెస్టు చేసి కఠినంగా శిక్షించాలని అచల్ కుటుంబం డిమాండ్ చేసింది. ఈ ఘటనపై నటి ఆషికా రంగనాథ్ ఇప్పటికైతే నేరుగా స్పందించలేదు.
