లక్నో: ఉత్తరప్రదేశ్ ముఖ్యమంత్రి యోగి ఆదిత్యానాథ్ను ప్రధాని నరేంద్రమోడీ ప్రశంసల్లో ముంచెత్తారు. యూపీకి యోగి సర్కారు ఎంతో అవసరమంటూ.. ‘‘యూపీ+ యోగి = ఉపయోగి” అని చమత్కరించారు. మాఫియా ఆగడాలను అరికట్టి, అభివృద్ధి దిశగా రాష్ట్రాన్ని తీసుకుపోతున్నారని పొగిడారు. రూ. 36,230 కోట్లతో చేపడుతున్న 594 కిలోమీటర్ల గంగా ఎక్స్ప్రెస్వే ప్రాజెక్టుకు శనివారం షాజహాన్పూర్లో ప్రధాని మోడీ శంకుస్థాపన చేశారు. యూపీలో గత పాలకులు ప్రజాధనాన్ని ఎందుకోసం ఉపయోగించేవారో అందరికీ తెలిసిందేనని, ఇప్పుడున్న ప్రభుత్వం రాష్ట్ర అభివృద్ధి కోసమే ఆ డబ్బును ఖర్చు చేస్తున్నదని చెప్పారు. రాష్ట్రంలో మాఫియా అక్రమాలను నాలుగున్నరేండ్ల నుంచి యోగి సర్కారు బుల్డోజర్లు కూల్చేస్తుంటే ఆ మాఫియాను పెంచిపోషిస్తున్న వాళ్లకు వణుకుపుడుతున్నదని అన్నారు. కొన్ని పార్టీలు ఓటు బ్యాంకు కోసమే పనిచేస్తుంటాయని, ప్రజా సంక్షేమం వాటికి పట్టదని విమర్శించారు. ‘‘టెర్రరిస్టులపై ఆర్మీ యాక్షన్, వ్యాక్సిన్ తయారీ, మేక్ ఇన్ ఇండియా స్కీంను వేలెత్తి చూపడమే కొందరి పని. వాళ్లు ఇష్టమున్నట్లు మాట్లాడుతుంటారు. కాశీ, అయోధ్య అభివృద్ధి చెందుతుంటే వాళ్లకు సమస్యగా కనిపిస్తుంది” అంటూ ప్రతిపక్షాలపై మండిపడ్డారు. ఆరు లేన్ల ఎక్స్ప్రెస్ వేను మున్ముందు ఎనిమిది లేన్ల ఎక్స్ప్రెస్ వేగా అభివృద్ధి చేస్తామని ప్రధాని వెల్లడించారు. ఎక్స్ప్రెస్వేలు, ఎయిర్పోర్టులు, కొత్త రైల్వే రూట్లు.. ఇట్లా అనేక కార్యక్రమాలతో ఉత్తరప్రదేశ్ముందుకెళ్తోందని, అతి త్వరలోనే ఆధునిక రాష్ట్రంగా మారుతుందని చెప్పారు.
