పాతబస్తీలో దారుణం చోటుచేసుకుంది. కంటికి రెప్పలా కాపాడాల్సిన తండ్రే.. కొడుకును కర్కషంగా చితకబాదాడు. ఈ వీడియో సోషల్ మీడియాలో వైరల్ గా మారింది. ఛత్రినాక పోలీస్ స్టేషన్ పరిధిలో శనివారం మధ్యాహ్నం 3 గంటల సమయంలో ఈ ఘటన జరిగింది. స్థానికంగా నివసించే అశోక్ అనే వ్యక్తి తన పది సంవత్సరాల కొడుకును ఇంట్లో ఎవరూ లేని సమయంలో కొట్టి గాయపరిచాడు. తప్పయ్యింది పప్పా.. క్షమించు అని కాళ్లావేళ్లా పడినా ఆ కసాయి తండ్రి వినకుండా.. కర్రతో విపరీతంగా కొట్టాడు. ఇంటికి వచ్చిన తల్లి జిజా బాయి.. కొడుకుపై జరిగిన దాడి తెలుసుకొని ఛత్రినాకా పీఎస్‌లో ఫిర్యాదు చేసింది. కేసు నమోదు చేసిన పోలీసులు.. దర్యాప్తు చేస్తున్నారు.
