మెదక్టౌన్, వెలుగు : పాతకక్షలతో ఒకచోట, వేధింపులు తట్టుకోలేక మరోచోట కుటుంబ సభ్యులను సొంతోళ్లే చంపేశారు. ఆ నేరం తమపై పడకుండా వాటిని ఆత్మహత్యలుగా చిత్రీకరించేందుకు విశ్వప్రయత్నాలు చేసి కటకటాలపాలయ్యారు. ఇటీవల మెదక్ జిల్లాలో రెండు చోట్ల జరిగిన మర్డర్ కేసులను పోలీసులు ఛేదించారు. రెండు ఘటనల్లో ఆరుగురి నిందితులను అరెస్టు చేశారు. మెదక్ డీఎస్పీ ఆఫీసులో శుక్రవారం అడిషనల్ఎస్పీ కేసుల వివరాలను మీడియాకు వెల్లడించారు.
పాతకక్షలతో..
మెదక్పట్టణంలోని అవుసులపల్లికి చెందిన తాడెపు పోచయ్య కుమారుడు శివాజీ(23) మెకానిక్గా పని చేసేవాడు. అతడు ఈనెల 28న రోడ్డు ప్రమాదంలో చనిపోయాడని అందరూ భావించారు. కానీ మృతుడి తండ్రి పోచయ్య అనుమానం వ్యక్తం చేస్తూ మెదక్ రూరల్ పోలీస్స్టేషన్లో ఫిర్యాదు చేశాడు. పోలీసులు విచారణ చేపట్టడంతో శివాజీ హత్యకు గురైనట్లు తేలింది. 27న సాయంత్రం అదే గ్రామానికి చెందిన పోచయ్య అన్నదమ్ముల పిల్లలు తాడెపు సాయిలు, తాడెపు లక్ష్మణ్తో పాటు ట్రాక్టర్ మెకానిక్లైన మొరికే మల్లేశం, కుంటి దుర్గా బన్నీ కలిసి శివాజీని వెంటబెట్టుకుని మెదక్ హౌసింగ్ బోర్డు కాలనీలోని ఓ ప్రైవేట్ వెంచర్లోకి వెళ్లారు. శివాజీతో వారికి వ్యాపారానికి సంబంధించిన గొడవలున్నాయి. నలుగురు కలిసి శివాజీని రాడ్లతో కొట్టి హత్య చేశారు. అదే రోజు రాత్రి డెడ్బాడీని తమ టూ వీలర్పై తీసుకెళ్లి మెదక్–రామాయంపేట రోడ్డులో యాక్సిడెంట్గా క్రియేట్ చేశారు. మరుసటిరోజు స్థానికులు ఇచ్చిన సమాచారంతో మృతుడి కుటుంబ సభ్యులకు విషయం తెలిసిందని ఏఎస్పీ వివరించారు. నలుగురి నిందితులను అరెస్టు చేసినట్లు తెలిపారు.
అన్నంలో విషం పెట్టి.. ఉరివేసి..
హవేలీఘనపూర్మండలం నాగాపర్ గ్రామానికి చెందిన చింతకింది దేవేందర్(35) గతంలోనే భార్యతో విడాకులు తీసుకున్నాడు. తల్లి భూమవ్వ, తమ్ముడు కృష్ణతో కలిసి ఉంటున్నాడు. అయితే ఈనెల 17న దేవేందర్చనిపోయాడు. అతడు మద్యానికి బానిసై ఉరివేసుకొని ఆత్మహత్య చేసుకున్నాడని తల్లి, తమ్ముడు చెప్పారు. అదే రోజు అంత్యక్రియలు నిర్వహించారు. ఇదిలా ఉండగా దేవేందర్ది ఆత్మహత్య కాదని, అనుమానాలు ఉన్నాయని స్థానికుల ద్వారా పోలీసులకు సమాచారం అందింది. ఈ మేరకు పోలీసులు విచారణ చేపట్టారు. దేవేందర్ మద్యం తాగి రోజూ తమతో గొడవపడుతున్నాడని తల్లి, తమ్ముడు కలిసి అన్నంలో విషం పెట్టి అతడిని చంపేశారు. అనంతరం డెడ్బాడీని తాడుకు వేలాడదీశారు. తాగుడుకు బానిసై ఆత్మహత్య చేసుకున్నాడని గ్రామస్తులను నమ్మించారు. కానీ పోలీసుల విచారణలో అసలు విషయం బయటపడింది. ఈ మేరకు వారిద్దని అరెస్టు చేసి రిమాండ్కు తరలించినట్లు ఏఎస్పీ తెలిపారు. సమావేశంలో మెదక్ డీఎస్పీ సైదులు, మెదక్ రూరల్ సీఐ విజయ్, మెదక్ రూరల్ ఎస్సై మోహన్రెడ్డి, హవేలీఘనపూర్ ఎస్సై మురళి
పాల్గొన్నారు.
