ఒకప్పటితో పోల్చితే శానిటరీ నాప్కిన్స్ వాడకం పెరిగింది. ఇది మంచి విషయమే అయినప్పటికీ.. భయపడాల్సిందే. కారణం ఆ ప్యాడ్స్లో ఉండే హానికారక కెమికల్స్. వాటివల్ల చాలామందికి అలర్జీలు, ఇన్ఫెక్షన్లు వస్తున్నాయి. ప్లాస్టిక్తో నిండిన ఆ ప్యాడ్స్ ఏండ్ల తరబడి నేలపై చెత్తలా పేరుకుపోతున్నాయి కూడా. ఇవన్నీ తెలిసినప్పటికీ .. మరో ఆప్షన్ తెలియక వాటినే వాడుతున్నారు చాలామంది. కానీ, ఆడవాళ్ల ఆరోగ్యానికి, పర్యావరణానికి మేలు చేసే క్లాత్ ప్యాడ్స్, మెనుస్ట్రువల్ కప్స్ ఉన్నాయి. అలాగే పిల్లలకి క్లాత్ డైపర్లు వచ్చాయి. వీటిని తిరిగి వాడుకోవచ్చు కూడా. ఇదే విషయాన్ని అందరికీ చెప్పడానికి సిద్దిపేటలో ‘రుతు ప్రేమ’ కార్యక్రమాన్ని మొదలుపెట్టారు.
మార్కెట్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌లో దొరికే శానిటరీ ప్యాడ్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌లను సింథటిక్‌, ప్లాస్టిక్తో తయారు చేస్తారు. అవి మంచి వాసన రావడానికి పాలిథిలీన్, పాలీప్రొపైలిన్, ప్రొపైలిన్ గ్లైకాల్తో నిండిన ఆర్టిఫిషియల్ ఫ్రాగ్రెన్స్లని వాడతారు. అలాగే క్లోరో ఈథేన్, క్లోరో మీథేన్, నెయిల్ పాలిష్ రిమూవర్స్లో ఉండే ఎసిటోన్, కారు టైర్ల తయారీలో వాడే స్టైరీన్ ఉంటాయి. వీటివల్ల రకరకాల వ్యాధులు సోకే అవకాశం ఉంది. శానిటరీ ప్యాడ్స్ తయారీలో వాడే మరికొన్ని కెమికల్స్ వల్ల ఇన్ఫెర్టిలిటీ, అండాశయ క్యాన్సర్, డయాబెటిస్, డిప్రెషన్, హార్మోనల్ ఇంబాలెన్స్ లాంటి సమస్యలు వస్తాయి. పైగా ఇవి భూమిలో కరగడానికి వేల సంవత్సరాలు పడుతుంది. అలాకాదని కాల్చితే గాలి కలుషితం అవుతుంది. అందుకే వీటికి బదులుగా ఉతికి మళ్లీ ఉపయోగించుకునే కాటన్ ప్యాడ్స్ వచ్చాయి. మెనుస్ట్రువల్ కప్స్ కూడా అందుబాటులో ఉన్నాయి. ఇదే విషయాన్ని అందరికీ చెప్పాలన్న ఉద్దేశంతో ‘స్టోన్ సూప్’ అనే సంస్థ సిద్దిపేట జిల్లా అధికారులతో కలిసి పని చేస్తోంది.
సైడ్ ఎఫెక్ట్స్ ఉండవు
సిద్దిపేట మున్సిపాలిటీ పరిధిలోని 5వ వార్డులో కిందటి నెలల్లో ‘రుతు ప్రేమ’ కార్యక్రమం మొదలైంది. ఇందులో భాగంగా ఇంటింటికి వెళ్లి రీయూజబుల్ క్లాత్ ప్యాడ్స్, డైపర్లు, మెనుస్ట్రువల్ కప్స్ గురించి చెప్తున్నారు. మహిళా ఉద్యోగులు, డ్వాక్రా గ్రూపు మహిళలకు, అంగన్వాడీ టీచర్లకు, స్టూడెంట్స్కి వీటి గురించి వివరిస్తున్నారు. వీటిని ఫ్రీగా పంచి పెడుతున్నారు కూడా. అయితే ఈ క్లాత్ ప్యాడ్స్ని రెండేండ్ల వరకు, మెనుస్ట్రువల్ కప్పులని ఎనిమిది నుంచి పదేండ్ల వరకు వాడుకోవచ్చు. వీటివల్ల ఎలాంటి సైడ్ ఎఫెక్ట్స్ ఉండవు. పైగా పర్యావరణానికి ఎలాంటి హాని జరగదు. డబ్బు కూడా ఆదా అవుతుందని చెప్తోంది స్టోన్ సూప్ సంస్థ.
:: రఘునందన్ స్వామి, సిద్దిపేట, వెలుగు
