సికింద్రాబాద్, విజయవాడ, గుంతకల్ డివిజన్ల పరిధిలో గంటకు 130 కి.మీ స్పీడ్
సికింద్రాబాద్, వెలుగు: రైళ్లు మరింత వేగంతో పరుగెత్త నున్నాయి. దక్షిణ మధ్య రైల్వే పరిధిలోని సికింద్రాబాద్, విజయవాడ, గుంతకల్ డివిజన్ల పరిధిలో గంటకు 130 కిలోమీటర్ల వేగంతో నడిచే రైళ్లను సోమవారం ప్రారంభించారు. దీంతో ఆ డివిజన్ల పరిధిలో రైళ్ల వేగంలో దక్షిణ మధ్య రైల్వే జోన్ మరో మైలురాయిని అధిగమించింది. ఈ సెక్షన్లలో అభివృద్ధి పనులు పూర్తి చేసిన అధికారులు ఇప్పటివరకు ఉన్న రైళ్ల వేగాన్ని గంటకు 110 కి.మీల నుంచి 130 కి.మీకు పెంచారు. ట్రాక్ లను మరింత పటిష్టం చేసిన మార్గాల్లో మాత్రమే ఈ రైళ్లు నడుపుతారు. సికింద్రాబాద్ డివిజన్ పరిధిలోని సికింద్రాబాద్-– కాజీపేట-– బల్లార్ష, కాజీపేట– కొండపల్లి సెక్షన్లు, విజయవాడ డివిజన్ పరిధిలోని కొండ పల్లి–-విజయవాడ– -గూడూరు, గుంతకల్ డివిజన్ పరిధిలోని రేణిగుంట– గుంతకల్-, వాడి సెక్షన్ పరిధిలో ఈ వేగాన్ని అనుమతించారు. ఈ మార్గాలు రద్దీగా ఉండడంతో రైళ్ల వేగాన్ని పెంచుతూ నిర్ణయం తీసుకున్నారు.
ప్రస్తుతానికి వేగం పెంచిన రైళ్లు ఇవే..
ప్రస్తుతం ప్రీమియం రైలుగా ఉన్న రాజధాని, దురంతో ఎక్స్ప్రెస్ రైళ్ల వేగాన్ని ఏప్రిల్లోనే గంటకు 130 కిలోమీటర్లకు పెంచారు. సాధారణ ఎక్స్ప్రెస్ రైళ్లు ఇప్పటిదాకా 110 కిలోమీటర్ల వేగంతో నడుస్తున్నాయి. ఇప్పుడవన్నీ ఆయా రూట్లలో 130 కి.మీ వేగంతో దూసుకుపోతున్నాయి. గూడ్స్ రైళ్లల్లో కూడా వ్యాగన్ల రకాన్ని బట్టి వేగంలో మార్పులు చేశారు. కొన్ని గూడ్స్ రైళ్లు 120 కి.మీ వేగంతో, మరికొన్ని 100 కి.మీ, ఇంకొన్ని 80 కి.మీ వేగంతో వెళ్తున్నాయి. స్వర్ణచతుర్భుజి, స్వర్ణవికర్ణ మార్గాలే కాకుండా మరికొన్ని కారిడార్లలో కూడా రైళ్లను 130 కి.మీ వేగంతో నడిపేందుకు అధికారులు ఏర్పాట్లు చేస్తున్నారు.