మల్కాజిగిరిలో మాయ చేసేదెవరో?

సునీతారెడ్డిని గెలిపించేందుకు సీఎం వ్యూహం
వ్యక్తిగత ఇమేజ్, మోదీ చరిష్మా గెలిపిస్తుందంటున్న ఈటల
ప్రజలు తమ వైపే ఉన్నారంటూ బీఆర్ఎస్ అభ్యర్థి ప్రచారం

హైదరాబాద్, వెలుగు : దేశంలోనే అతిపెద్ద నియోజకవర్గమైన మల్కాజిగిరి పార్లమెంట్లో మూడు ప్రధాన పార్టీల మధ్య టఫ్ ఫైట్నడుస్తోంది. సిట్టింగ్సీటును నిలబెట్టుకునేందుకు కాంగ్రెస్ తీవ్రంగా ప్రయత్నిస్తోంది. ఈ నియోజకవర్గం నుంచి కాంగ్రెస్అభ్యర్థి సునీతామహేందర్రెడ్డిని గెలిపించేందుకు ముఖ్యమంత్రి రేవంత్రెడ్డి ప్రత్యేక దృష్టి పెట్టారు. ఇక కేంద్రంలో మోదీ చరిష్మాతో ఈసారి తన గెలుపు ఖాయమన్న ధీమాతో బీజేపీ అభ్యర్థి ఈటల రాజేందర్ప్రచారంలో జోరు పెంచారు. మొన్నటి అసెంబ్లీ ఎన్నికల్లో ఈ పార్లమెంట్నియోజకవర్గ పరిధిలోని అన్ని స్థానాలను బీఆర్ఎస్ కైవసం చేసుకోగా, తన గెలుపు పెద్ద కష్టం కాదని ఆ పార్టీ అభ్యర్థి రాగిడి లక్ష్మారెడ్డి నమ్మకంతో ఉన్నారు. దేశంలోనే పెద్ద నియోజకవర్గంగా పేరున్న మల్కాజిగిరిలో 37,28,417 మంది ఓటర్లుండగా పురుషులు 19,21,756, మహిళా ఓటర్ల సంఖ్య18,06,134 ఉంది. 527 మంది ట్రాన్స్జెండర్లు ఉన్నారు. అత్యధిక శాతం బీసీ ఓటర్లు కాగా.. సెటిలర్లు, మైనారిటీలు, యువ ఓటర్లు కీలకంగా ఉన్నారు. ఈ నియోజక వర్గం నుంచి 2018 ఎన్నికల్లో ప్రస్తుత సీఎం రేవంత్రెడ్డి కాంగ్రెస్అభ్యర్థిగా పోటీ చేసి 6,03,748 ఓట్లు సాధించారు. తన సమీప ప్రత్యర్థి, బీఆర్ఎస్ పార్టీకి చెందిన మర్రి రాజశేఖరరెడ్డిపై 10,919 ఓట్ల మెజారిటీతో గెలుపొందారు. ప్రస్తుతం కాంగ్రెస్, బీజేపీ, బీఆర్ఎస్ల నుంచి బలమైన అభ్యర్థులు పోటీ చేస్తుండడంతో ఎవరు గెలుస్తారో చెప్పలేని పరిస్థితి నెలకొంది.

సెటిలర్లు, మైనారిటీలే కీలకం

ఈ పార్లమెంట్నియోజక వర్గ పరిధిలోకి ఎల్బీనగర్, మేడ్చల్, మల్కాజిగిరి, కుత్బుల్లాపూర్, కూకట్పల్లి, ఉప్పల్, సికింద్రాబాద్, కంటోన్మెంట్అసెంబ్లీ నియోజకవర్గాలున్నాయి. ముఖ్యంగా ఎల్బీనగర్, కూకట్పల్లి, కుత్బుల్లాపూర్, ఉప్పల్నియోజకవర్గాల్లో ఏపీ ఓటర్లే కీలకం. వీరు దాదాపు యాబై శాతానికి మించి ఉండడంతో గెలుపోటములను ప్రభావితం చేసే స్థితిలో ఉన్నారు. అలాగే మైనారిటీల సంఖ్యా తక్కువేం కాదు. మేడ్చల్, మల్కాజిగిరి, కంటోన్మెంట్ నియోజకవర్గాల్లో బీసీ ఓటర్లు అత్యధికంగా ఉన్నారు. బ్రాహ్మణులు, తమిళ ఓటర్లు కూడా ఎక్కువే. ప్రతిసారి ఎన్నికల్లో సీమాంధ్రులు అధికంగా ఉన్న నియోజకవర్గాల్లోని ఓటింగ్శాతమే అభ్యర్థి గెలుపోటములను నిర్ణయిస్తోంది. ఈసారి కూడా సీమాంధ్రులు, బీసీలు, మైనారిటీలు కీలకం కావడంతో, దీన్ని దృష్టిలో పెట్టుకుని పార్టీలు ప్రచారంలో ప్లాన్లు అమలు చేస్తున్నాయి.

సిట్టింగ్సీటును నిలబెట్టుకునేందుకు కాంగ్రెస్ స్కెచ్

కాంగ్రెస్ పార్టీ సిట్టింగ్ సీటు అయిన మల్కాజిగిరి పార్లమెంట్ సెగ్మెంట్ను నిలబెట్టుకునేందుకు ఆ పార్టీ తీవ్రంగా శ్రమిస్తోంది. సిట్టింగ్ ఎంపీ రేవంత్రెడ్డి ముఖ్యమంత్రి కావడంతో ఈసారి మల్కాజిగిరి నుంచి సునీతా మహేందర్రెడ్డిని గెలిపించాలనే పట్టుదలతో ఉన్నారు. ఇప్పటికే అన్ని అసెంబ్లీ నియోజకవర్గాల్లో ప్రచారం పూర్తి చేశారు. కాంగ్రెస్పార్టీ అధికారంలో ఉండడం, ఆరు గ్యారంటీలు గెలిపిస్తాయని ఆ పార్టీ అభ్యర్థి సునీతా మహేందర్రెడ్డి ధీమాతో ఉన్నారు. ఆమె భర్త మహేందర్రెడ్డి మాజీ మంత్రి కావడంతో ఆయనకు ఉన్న పరిచయాలు తన గెలుపుకు దోహదం చేస్తాయని అమె నమ్ముతున్నారు. ఆ పార్టీ లీడర్లు, కార్యకర్తలు కూడా అదే స్థాయిలో గెలుపు కోసం పని చేస్తున్నారు. ముఖ్యమంత్రి రేవంత్రెడ్డి సైతం మల్కాజిగిరిలో రోడ్షోలు నిర్వహించారు. సునీతా మహేందర్రెడ్డి కూడా నియోజకవర్గంలోని కీలకమైన ఎల్బీనగర్, కూకట్పల్లి, కుత్బుల్లాపూర్, మల్కాజిగిరి నియోజకవర్గాలపై ప్రత్యేక దృష్టి పెట్టి ప్రచారం చేస్తున్నారు. కేంద్రంలోనూ కాంగ్రెస్అధికారంలోకి వస్తుందని, ఈ నియోజకవర్గం నుంచి తనను గెలిపిస్తే మరింత అభివృద్ధి చేస్తానంటూ ఆమె ప్రచారంలో హామీ ఇస్తున్నారు.

గెలుపు తమదేనంటున్న బీఆర్ఎస్

బీఆర్ఎస్అభ్యర్థిగా ఈసారి ఊహించని విధంగా రాగిడి లక్ష్మారెడ్డి తెరపైకి వచ్చారు. మల్కాజిగిరి స్థానం నుంచి మాజీ మంత్రి మల్లారెడ్డి పోటీ చేస్తారని లేదా ఆయన కొడుక్కి టికెట్ఇస్తారని మొదట్లో ప్రచారం జరిగింది. చివరకు ఉప్పల్నియోజకవర్గానికి చెందిన రాగిడి లక్ష్మారెడ్డిని బీఆర్ఎస్అధినేత కేసీఆర్అభ్యర్థిగా ప్రకటించారు. అసెంబ్లీ ఎన్నికల్లో అధికారం కోల్పోవడంతో ఆ పార్టీ తరఫున పార్లమెంట్ఎన్నికల్లో పోటీ చేసేందుకు ఎవరూ ముందుకు రాలేదు. దీంతో రాగిడికి టిక్కెట్దక్కిందన్న ప్రచారం జరిగింది. ఆయన కూడా అభ్యర్థిగా ప్రకటించిన వెంటనే ప్రచారం మొదలుపెట్టారు. ఈ నియోజకవర్గ పరిధిలోని ఏడు అసెంబ్లీ స్థానాల్లో బీఆర్ఎస్ఎమ్మెల్యేలు ప్రాతినిథ్యం వహిస్తున్నా ప్రచారంలో మాత్రం అంటీముట్టనట్టుగానే ఉంటున్నారు. దీంతో లక్ష్మారెడ్డి కేటీఆర్,కేసీఆర్ల ప్రచారాన్నే నమ్ముకున్నారు. నియోజకవర్గంలో కీలకంగా ఉన్న సెటిలర్లు అసెంబ్లీ ఎన్నికల్లో లెక్కనే పార్లమెంట్ఎన్నికల్లోనూ సపోర్ట్చేసి గెలిపిస్తారని లక్ష్మారెడ్డి నమ్ముతున్నారు.

మోదీ చరిష్మానే నమ్ముకున్న బీజేపీ

మల్కాజిగిరి నుంచి బీజేపీ అభ్యర్థిగా మాజీ మంత్రి ఈటల రాజేందర్బరిలో నిలిచారు. మొన్నటి అసెంబ్లీ ఎన్నికల్లో హుజూరాబాద్తో పాటు గజ్వేల్అసెంబ్లీ స్థానాల నుంచి పోటీ చేసి ఓడిపోయిన ఈటల రాజేందర్ కు ఇక్కడ గెలవడం చాలా అవసరం. తెలంగాణ ఉద్యమంలో పాల్గొనడంతో పాటు బీఆర్ఎస్లో సుమారు ఏడేండ్లు మంత్రిగా పని చేశారు. కొన్ని కారణాల వల్ల బీఆర్ఎస్ను వీడి బీజేపీలో చేరిన ఆయన మల్కాజిగిరి ఎంపీగా తన అదృష్టాన్ని పరీక్షించుకుంటున్నారు. వ్యక్తిగత ఇమేజ్తో పాటు మోదీ ఛరిష్మా, కేంద్రంలోని బీజేపీ సర్కారు అమలు చేస్తున్న సంక్షేమ పథకాలు, అయోధ్య రామమందిర నిర్మాణం గెలుపుకు దోహదం చేస్తాయని భావిస్తున్నారు. మరోవైపు ఈటల రాజేందర్కు టికెట్ఇవ్వడంపై పార్టీలోని ఒక వర్గం అసంతృప్తితో ఉన్నట్టు తెలుస్తోంది.