జైపూర్/కోల్బెల్ట్, వెలుగు: సింగరేణి ఓపెన్కాస్ట్ మైన్ల ఏర్పాటుకు భూములు, ఇండ్లను తీసుకుంటున్న సర్కార్ ముంపు, నిర్వాసిత గ్రామాల్లోని యువతకు ఉపాధి కల్పిస్తామని ఇచ్చిన హామీలను నెరవేర్చడం లేదని సీఎల్పీ నేత మల్లు భట్టి విక్రమార్క ఆరోపించారు. ఆదివారం మంచిర్యాల జిల్లా జైపూర్ మండలం ఎస్సార్పీ సింగరేణి ఓసీపీ ప్రభావిత గ్రామాలైన దుబ్బపల్లి, రామారావుపేట గ్రామాల్లో భట్టి విక్రమార్క పాదయాత్ర కొనసాగింది. ఈ సందర్భంగా ఆయన స్థానిక కాంగ్రెస్ లీడర్లతో కలిసి శ్రీరాంపూర్ సింగరేణి ఓపెన్కాస్ట్ మైన్ను పరిశీలించారు.
ఓసీపీ ముంపు, నిర్వాసిత గ్రామాలైన సింగాపూర్, తాళ్లపల్లి, గుత్తేదారిపల్లి గ్రామస్తులు రుక్మ మల్లేశ్, తోట కిష్టయ్య, శ్రీనివాస్, స్వామి తదితరులు భట్టిని కలిసి వారి సమస్యలను చెప్పుకున్నారు. తమ గ్రామాల్లోని భూములు, ఇండ్లు అన్నింటిని ఓసీపీ కోసం సర్కార్ తీసుకుందని, గ్రామాల్లోని యువకులకు ఉద్యోగాలు ఇస్తామని హామీ ఇచ్చినట్లు చెప్పారు. ఇప్పుడు స్థానికులకు కాకుండా బయటివాళ్లకు ఉద్యోగాలు ఇస్తున్నారని ఆరోపించారు. మూడు గ్రామాల్లో సుమారు వెయ్యి మంది యువకులు ఉద్యోగం, ఉపాధి లేక అవస్థలు పడుతున్నారన్నారు.
ఓపెన్కాస్ట్కాకుండా అండర్గ్రౌండ్మైన్ ఏర్పాటు చేస్తే తమ భూములు, ఇండ్లను కోల్పోయేవారం కాదని, ఉపాధి, ఉద్యోగాలు కూడా వచ్చేవని అన్నారు. భట్టి విక్రమార్క మాట్లాడుతూ రాష్ట్రంలో వచ్చేది కాంగ్రెస్ ప్రభుత్వమేనని, ఓపెన్కాస్ట్ ముంపు, నిర్వాసిత గ్రామాల ప్రజల సమస్యలను పరిష్కరిస్తామని హామీ ఇచ్చారు. పాదయాత్రలో డీసీసీ ప్రెసిడెంట్ కొక్కిరాల సురేఖ, పీసీసీ జనరల్ సెక్రటరీ రఘునాథ్రెడ్డి, నియోజకవర్గ లీడర్నూకల రమేశ్, పుల్లూరి లక్ష్మన్, ఫయాజ్తదితరులు పాల్గొన్నారు.
