‘క్యాష్ ఫర్ క్వశ్చన్స్’ ఆరోపణలతో పార్లమెంట్ సభ్యత్వం కోల్పోయిన టీఎంసీ నాయకురాలు మహువా మొయిత్రా మళ్లీ ఎంపీగా పోటీ చేసేందుకు సిద్ధమయ్యారు. ఆమెను కృష్ణానగర్ లోక్సభ స్థానం టీఎంసీ అభ్యర్థిగా ఆ పార్టీ చీఫ్ మమతా బెనర్జీ ప్రకటించారు.
కోల్కతా: ‘క్యాష్ ఫర్ క్వశ్చన్స్’ వివాదంలో అవినీతి ఆరోపణలు ఎదుర్కొని పార్లమెంట్ సభ్యత్వం కోల్పోయిన టీఎంసీ నాయకురాలు మహువా మొయిత్రా మళ్లీ ఎంపీగా పోటీ చేసేందుకు సిద్ధమయ్యారు. కృష్ణానగర్ నుంచి లోక్సభ అభ్యర్థిగా ఆమెను టీఎంసీ చీఫ్ మమతా బెనర్జీ బరిలో దింపారు. లోక్సభ నుంచి బహిష్కరణకు గురికావడంతో ఇక మహువా రాజకీయ జీవితం ముగిసినట్టే అని చాలామంది అనుకున్నారు.
కానీ.. అనూహ్యంగా ఆమెను మళ్లీ అదే లోక్సభ సెగ్మెంట్ నుంచి టీఎంసీ చీఫ్ బరిలోకి దింపారు. ఈమేరకు ఆదివారం కోల్‌‌‌‌‌‌‌‌కతాలోని బ్రిగేడ్ పరేడ్ గ్రౌండ్ ఏర్పాటు చేసిన సభలో టీఎంసీ నేత అభిషేక్ బెనర్జీ 42 ఎంపీ స్థానాలకు అభ్యర్థులను ప్రకటించారు. కాగా, బెంగాల్లో తాము ఒంటరిగానే పోటీ చేస్తామని ఇప్పటికే ఇండియా కూటమి నేతలకు మమత తేల్చి చెప్పారు. క్యాష్ ఫర్ క్వశ్చన్ వివాదంలో మహువా ఆరోపణలు ఎదుర్కొంటున్న టైమ్లో టీఎంసీ ఆమెకు మద్దతు ఇచ్చేందుకు ఆసక్తి చూపించలేదు. ఎథిక్స్ కమిటీ విచారణ తర్వాత ఆమె లోక్సభ నుంచి బహిష్కరణకు గురయ్యారు. అప్పుడు పార్టీ చీఫ్, బెంగాల్ సీఎం మమతా బెనర్జీ స్పందించారు. మహువాపై బహిష్కరణ వేటును.. ప్రజాస్వామ్య హత్యగా అభివర్ణించారు.
