- 12వ వేజ్ బోర్డును వెంటనే ఏర్పాటు చేయాలి
గోదావరిఖని/ కోల్బెల్ట్/నస్పూర్,వెలుగు: తెలంగాణలోని బొగ్గు బ్లాక్లన్నీ సింగరేణికే కేటాయించాలని, 4 లేబర్ కోడ్లతో సంబంధం లేకుండా కార్మికుల వేతన ఒప్పందానికి 12వ వేజ్బోర్డును వెంటనే ఏర్పాటు చేయాలని కోరుతూ పలు కార్మిక సంఘాల ప్రతినిధులు కేంద్ర బొగ్గు శాఖ మంత్రి జి.కిషన్ రెడ్డిని కోరారు. సింగరేణి భరోసాయాత్రలో భాగంగా మంగళవారం పెద్దపల్లి జిల్లా గోదావరిఖనికి వచ్చిన కేంద్రమంత్రికి వినతిపత్రాలు అందజేసి మాట్లాడారు. తాడిచర్ల బ్లాక్- 2ను సింగరేణికి కేటాయించినందుకు ఏఐటీయూసీ లీడర్లు కేంద్రమంత్రికి కృతజ్ఞతలు తెలిపారు.
సింగరేణి ప్రయోజనాల పరిరక్షణకు, సంస్థాగత బలోపేతం కోసం ప్రత్యేక చొరవ తీసుకోవాలని కోరుతూ 9 కీలక అంశాలతో కూడిన వినతి పత్రాన్ని టీబీజీకేఎస్ లీడర్లు అందజేశారు. సింగరేణి కార్మికుల సమస్యలపై సీఐటీయూ నాయకులు విన్నవించారు. మంచిర్యాల జిల్లాలో పర్యటించిన కిషన్రెడ్డిని వివిధ సింగరేణి కార్మిక సంఘాలు, రాజకీయ పార్టీలు, స్వచ్ఛంద సంస్థల బాధ్యులు కలిసి పలు వినతులను అందించారు.
