- గంటల్లోనే కౌన్సిలర్ను బహిష్కరించిన టీఆర్ఎస్
- సర్కార్ భూమి కబ్జా చేశాడని కేసు
- శ్రీనివాస్ గౌడ్ నుంచి ప్రాణహాని ఉందని హెచ్ఆర్సీలో మహబూబ్నగర్ నేత ఫిర్యాదు
మహబూబ్నగర్, వెలుగు: మంత్రితో ప్రాణహాని ఉందని హెచ్ ఆర్సీలో ఫిర్యాదు చేసిన టీఆర్ఎస్ పార్టీ కౌన్సిలర్పై గంటల్లోనే చర్యలు స్టార్ట్ అయ్యాయి. పార్టీ నుంచి బహిష్కరించడంతోపాటు.. తక్షణం రంగంలోకి దిగిన రెవెన్యూ ఆఫీసర్లు మున్సిపాల్టిలో భూ ఆక్రమణలపై ఎంక్వైరీ చేసి కౌన్సిలర్ భూ కబ్జా చేశాడంటూ పోలీసులకు కంప్లైంట్చేశారు. మంత్రి మీద ఫిర్యాదు చేస్తే రియాక్షన్ ఈ స్థాయిలో ఇంత ఫాస్ట్గా ఉంటదా? అని జనం ముక్కున వేలేసుకుంటున్నారు. ఎక్సైజ్ శాఖ మంత్రి వి.శ్రీనివాస్గౌడ్ వేధిస్తున్నారని, ఆయన్నుంచి ప్రాణహాని ఉందని మహబూబ్నగర్ మున్సిపాలిటీ టీఆర్ఎస్ కౌన్సిలర్ బురుజు సుధాకర్రెడ్డి హైదరాబాద్లోని హెచ్ఆర్సీలో ఫిర్యాదు చేశారు. తర్వాత మీడియాతో మాట్లాడారు. మున్సిపాలిటీ పరిధిలో జరుగుతున్న భూ కబ్జాలు, అక్రమ నిర్మాణాలపై ఆధారాలతో సహా మంత్రి కేటీఆర్, కలెక్టర్, మున్సిపల్ కమిషనర్ కు ఫిర్యాదు చేశానన్నారు. కానీ, అక్రమార్కులపై చర్యలు తీసుకోకుండా మంత్రి శ్రీనివాస్గౌడ్అడ్డుకుంటున్నారని, ఈ విషయంలో తనపై కక్ష కట్టారని కౌన్సిలర్ ఆవేదన వ్యక్తం చేశారు. తనపై అక్రమ కేసులు బనాయిస్తున్నారని ఆరోపించారు. తన హత్యకు కూడా ప్లాన్ చేస్తున్నారని ఆందోళన వ్యక్తం చేశారు.
కౌన్సిలర్ డబ్బులు వసూలు చేస్తుండు
మంత్రిపై ఫిర్యాదు చేసిన కౌన్సిలర్ను టీఆర్ఎస్ నుంచి బహిష్కరిస్తున్నట్లు ఆ పార్టీ మహబూబ్ నగర్ అధ్యక్షుడు బాద్మి శివకుమార్ ప్రకటించారు. ఇండ్ల నిర్మాణ అనుమతుల కోసం కాలనీ వాసుల నుంచి సుధాకర్రెడ్డి డబ్బులు వసూలు చేస్తున్నాడని ఆరోపించారు. దీనిపై మంత్రి హెచ్చరించినా తీరు మార్చుకోలేదని చెప్పారు. అవినీతి, అక్రమాలకు పాల్పడుతున్న సుధాకర్రెడ్డి కేసులు, అరెస్టు నుంచి తప్పించుకునేందుకు మంత్రిపై ఫిర్యాదు చేశాడని మున్సిపల్ చైర్మన్ కోరమోని నర్సింహులు విమర్శించారు.
హుటాహుటిన భూముల ఎంక్వైరీ
మహబూబ్నగర్ అర్బన్ తహసీల్దార్ పార్థసారథి మంగళవారం సాయంత్రం హుటాహుటిన టౌన్లోని రాంనగర్ హైస్కూల్ఏరియాలో ఎంక్వైరీ చేశారు. స్కూల్ జాగా కబ్జా అయిందని.. బురుజు సుధాకర్ రెడ్డి 680 గజాల స్థలాన్ని ఆక్రమించి ఫేక్ రిజిస్ట్రేషన్ చేసుకున్నట్లు తేలిందని తెలిపారు. అతనిపై కేసు నమోదు చేయాలని పోలీసులకు ఫిర్యాదు చేసినట్లు చెప్పారు. అలాగే కలెక్టర్కు దీనిపై రిపోర్ట్ ఇస్తామని వివరించారు.
