టీఆర్ఎస్లో మహిళలకు అవమానాలు
అందుకే పార్టీ నుంచి బయటికి వచ్చా: గండ్ర నళిని
హైదరాబాద్, వెలుగు:‘టీఆర్ఎస్లో ఇంత అవమానకరమైన పరిస్థితులు ఉంటాయని ఊహించలేకపోయా.. మహిళలను మరీ ఇంత చిన్నచూపు చూస్తారని అనుకోలేదు. ఆరేండ్లు పార్టీ కోసం అహర్నిశలు శ్రమించా.. ఏ ఎన్నికలు వచ్చినా కష్టపడి పని చేశా.. ఒక ఉద్యమకారుడు, మాజీ ఎంపీ బిడ్డను. కేసీఆర్ను ఎన్నిసార్లు కలుద్దామన్నా అపాయింట్మెంట్ దొరకలె. ఇంక నావల్ల కాలేదు. అందుకే పార్టీకి రాజీనామా చేశా..’ అని టీఆర్ఎస్ మాజీ నాయకురాలు, కరీంనగర్ నేత గండ్ర నళిని నారాయణ రెడ్డి అన్నారు. గతంలో కరీంనగర్, వేములవాడ నుంచి పోటీ చేసిన గండ్ర నళిని నిజామాబాద్మాజీ ఎంపీ, తెలంగాణ ఉద్యమకారుడైన ఎం.నారాయణ రెడ్డిబిడ్డ.
సహనం నశించి బయటకు వచ్చా
‘మా నాన్న 1969 ఉద్యమ కాలంలో తెలంగాణ కోసం పార్లమెంట్ లో ప్రసంగాలు చేశారు. ప్రత్యేక రాష్ట్రం కోసం పోరాటం చేశారు. కేసీఆర్ కూడా నాన్న దగ్గరికి వచ్చి సలహాలు తీసుకునేవారు. లంచ్లు చేసేవారు. అట్లాంటి కుటుంబం నుంచి వచ్చి టీఆర్ఎస్ కోసం ఎంతో పని చేస్తే చెప్పరానంత అవమానానికి గురి చేశారు. కుటుంబ పార్టీగా తయారైంది టీఆర్ఎస్. అందరికీ పదవులు ఇచ్చుకున్నారు. దగ్గరి వాళ్లకూ ఒక్కో కుటుంబంలో మూడేసి పదవులిస్తారు. మాలాంటి వాళ్లకు అపాయింట్ మెంట్ కూడా ఇవ్వరు. ఆ పార్టీలో ఉండడంలో అర్థం ఏముందని సహనం నశించి బయటకు వచ్చేశా. ఏం చేయాలో తర్వలో డిసైడ్ చేసుకుంటా..’ అని నళిని వెల్లడించారు.
పదవులియ్యలె.. మర్యాద దక్కలె
చదువుకున్న తనలాంటి వారిని పట్టించుకోకుండా బయట నుంచి వచ్చిన ఎవరికో పదవులు అంటగడుతున్నారని నళిని అన్నారు. కరీంనగర్లో పంచాయతీ ఎలక్షన్ల నుంచి కార్పొరేషన్ వరకు, జనరల్ ఎలక్షన్లలో కూడా పార్టీ కోసం పనిచేశాననీ, చివరకు ఈ మధ్య జరిగిన జీహెచ్ఎంసీ ఎన్నికల్లో తానుండే బంజారాహిల్స్ లో కూడా టీఆర్ఎస్ అభ్యర్థి గెలుపు కోసం కష్టపడ్డానని చెప్పారు. ‘ఎంత కష్టపడ్డా గుర్తింపు లేదు. పదవులు ఇవ్వకపోయినా పరవా లేదు. కనీస మర్యాద కూడా లేకుండా చూడడం అవమానకరం. ఒక రాజకీయ కుటుంబం, తెలంగాణ ఉద్యమ నేపథ్యమున్న నాకే ఈ పరిస్థితి ఉందంటే.. ఇట్లాంటి వాళ్లు పార్టీలో ఇంకెందరున్నారో అనిపిస్తున్నది. పైసల పార్టీగా మారిపోయింది టీఆర్ఎస్.. అసలు టాటా, బిర్లాలాంటోళ్లకు టికెట్లిచ్చుకుంటే ఏ బాధ ఉండదు’ అంటూ ఆమె ఆవేదన వ్యక్తం చేశారు. అందుకే తాను ఆ పార్టీని వదలక తప్పలేదన్నారు. మాజీ మంత్రి ఈటల రాజేందర్ తోపాటు రాజీనామా చేసిన తాను ఏం చేయాలో త్వరలో నిర్ణయించుకుంటానన్నారు.