హైదరాబాద్, వెలుగు: ఒలెక్ట్రా గ్రీన్టెక్ లిమిటెడ్ (ఓజీఎల్)కు టీఎస్ఆర్టీసీ 550 ఎలక్ట్రిక్ బస్సుల ఆర్డర్ ఇచ్చింది. మేఘా ఇంజనీరింగ్ అండ్ ఇన్ఫ్రాస్ట్రక్చర్స్ లిమిటెడ్ (ఎంఈఐఎల్) అనుబంధ సంస్థ ఒలెక్ట్రా గ్రీన్టెక్ లిమిటెడ్ 500 ఇంట్రాసిటీ, 50 ఇంటర్ సిటీ బస్సులను సంస్థకు అందజేయనుంది. ఈ ఆర్డర్ సౌతిండియాలోనే అతి పెద్దదని ఓజీఎల్ సీఎండీ కేవీ ప్రదీప్ సోమవారం ఒక ప్రకటనలో పేర్కొన్నారు. ఆర్డర్లో స్టాండర్డ్ ఫ్లోర్ 12 మీటర్లున్న 500 ఇంట్రాసిటీ, 50 ఇంటర్ సిటీ కోచ్ ఈ–బస్సులున్నాయని వివరించారు. విజయవాడకు వెళ్లే బస్సులు ఒక్కసారి చార్జింగ్ చేస్తే 325 కి.మీ కంటే ఎక్కువ దూరం ప్రయాణిస్తాయని తెలిపారు. హైదరాబాద్లో తిరిగే బస్సులను ఒక్కసారి చార్జింగ్ చేస్తే 225 కి.మీ కంటే ఎక్కువ దూరం వెళ్తాయని పేర్కొన్నారు. బస్సులను దశలవారీగా అందజేస్తామని తెలిపారు. ఆర్టీసీతో ఒలెక్ట్రా అనుబంధం 40 ఎలక్ట్రిక్ బస్సుల ఆర్డర్తో మార్చి 2019లోనే ప్రారంభమైందని తెలిపారు.
వచ్చే రెండేండ్లలో 3,400 బస్సులొస్తయ్
పర్యావరణ పరిరక్షణే లక్ష్యంగా మరిన్ని ఎలక్ట్రిక్ బస్సులకు ఆర్డర్ ఇచ్చామని ఆర్టీసీ చైర్మన్ బాజిరెడ్డి గోవర్ధన్ అన్నారు. వచ్చే రెండేండ్లలో 3,400 ఎలక్ట్రిక్ బస్సులను అందుబాటులోకి తీసుకొచ్చే యోచనలో ఉన్నామని తెలిపారు. మార్చి 2025 నాటికి హైదరాబాద్ అంతటా ఎలక్ట్రిక్ బస్సులు అందుబాటులోకి తీసుకురావాలని సంస్థ భావిస్తున్నదని టీఎస్ఆర్టీసీ ఎండీ వీసీ సజ్జనార్ అన్నారు.
