- మంత్రి పొంగులేటికి తెలంగాణ వర్కింగ్ జర్నలిస్ట్స్ ఫెడరేషన్ వినతి
హైదరాబాద్, వెలుగు: జర్నలిస్టుల సమస్యలను పరిష్కరించాలని రాష్ట్ర సమాచార, పౌరసంబంధాల శాఖ మంత్రి పొంగులేటి శ్రీనివాస్ రెడ్డిని తెలంగాణ వర్కింగ్ జర్నలిస్ట్స్ ఫెడరేషన్(టీడబ్ల్యూజేఎఫ్) కోరింది.
శనివారం సెక్రటేరియెట్లో టీడబ్ల్యూజేఎఫ్ అడ్ హక్ కమిటీ కన్వీనర్ రాంచందర్, ప్రధాన కార్యదర్శి బి.బసవ పున్నయ్య ఉపాధ్యక్షులు బి.రాజశేఖర్, పి రాధిక, గుడిగ రఘు, కార్యదర్శి చంద్రశేఖర్, హెచ్యూజే అధ్యక్షుడు అరుణ్ కుమార్ తదితరులు మంత్రికి వినతిపత్రం అందజేశారు. జర్నలిస్టుల సమస్యలపై మంత్రి చర్చించారు. వెంటనే అక్రిడిటేషన్లు ఇవ్వాలని, ప్రభుత్వ ఉద్యోగుల తరహాలో హెల్త్ స్కీం అమలు చేయాలని కోరారు.
అలాగే, ఇండ్లస్థలాల విషయంలో కొత్త విధానం తీసుకురావాలన్నారు. సుప్రీంకోర్టు తీర్పు నేపథ్యంలో.. ఇండ్లస్థలాల సమస్యలపై జర్నలిస్టు సంఘాలు, సీనియర్ జర్నలిస్టులతో సమావేశం నిర్వహించి పరిష్కరించాలన్నారు. ‘‘చనిపోయిన జర్నలిస్టులకు రూ. 20 లక్షల ఎక్స్ గ్రేషియా చెల్లించాలి. మహిళా జర్నలిస్టులకు రాత్రి పూట రవాణా సౌకర్యం కల్పించాలి. ఇతర రాష్ట్రాల మాదిరిగా.. రిటైర్డ్ జర్నలిస్టులకు పెన్షన్ విధానం అమలు చేయాలి. జర్నలిస్టులపై దాడులకు సంబంధించి అటాక్స్ కమిటీని నియమించాలి” అని విజ్ఞప్తి చేశారు.
స్పందించిన మంత్రి పొంగులేటి.. త్వరలో జర్నలిస్టు సంఘాలతో సమావేశం నిర్వహించి సమస్యలన్నీ పరిష్కరిస్తామని హామీ ఇచ్చారు. అంతకుముందు సమాచార శాఖ డైరెక్టర్ కిశోర్ బాబు, అదనపు డైరెక్టర్ డీఎస్ జగన్ ను కూడా టీడబ్ల్యూజేఎఫ్ నాయకులు కలిసి వినతిపత్రాలు అందజేశారు.
