గచ్చిబౌలి, వెలుగు : స్టూడెంట్లు, ఐటీ ఎంప్లాయీస్ టార్గెట్ గా నిషేధిత ఎలక్ట్రానిక్ సిగరెట్లను అమ్ముతున్న ఇద్దరిని రాయదుర్గం పోలీసులు అరెస్ట్ చేశారు. బేగంపేటకు చెందిన భారతం రాధా మాధవ్(19) శంకర్ పల్లిలోని ఐబీఎస్ కాలేజీలో చదువుతున్నాడు. గతంలో ఈ– సిగరెట్లను ఆన్ లైన్లో కొన్న మాధవ్ దాన్ని వ్యాపారంగా మార్చుకున్నాడు. కోల్కతాకు చెందిన దీప్, యష్, ముంబయికి చెందిన తేజ్కు వాట్సాప్లో ఆర్డర్లు పెడుతున్నాడు.
వారు కొరియర్ల ద్వారా ఈ– సిగరెట్లను పంపేవారు. మాధవ్ వాటిని సిటీలోని కాలేజీ స్టూడెంట్లకు, ఐటీ ఎంప్లాయీస్కు అమ్మేవాడు. ఇప్పటివరకు పంజాగుట్ట ఆమిటీ, శంకర్ల్లిలోని ఇన్ఫాయ్ కాలేజీ, బాచుపల్లిలోని మహీంద్రా, కొండాపూర్ సంస్కృతి కాలేజీ, షేక్పేటలోని ఆకాష్ ఇనిస్టిట్యూట్, పటాన్ చెరులోని గీతం కాలేజీలకు చెందిన 63 మంది స్టూడెంట్లకు అమ్మాడు. మాధవ్ వద్ద ఈ – సిగరెట్లను కొన్న పంజాగుట్ట ఆమిటీ బిజినెస్ స్కూల్కు చెందిన రాకేశ్(21) సైతం వాటిని పలువురికి అమ్మడం మొదలుపెట్టాడు. ఆ తర్వాత మాధవ్, రాకేశ్ కలిసి కోల్కతా నుంచి భారీగా ఈ– సిగరెట్లను తెప్పించి 71 మంది సాఫ్ట్ వేర్ ఎంప్లాయీస్, స్టూడెంట్లకు అమ్మారు.
దీనిగురించి సమాచారం అందుకున్న మాదాపూర్ జోన్ ఎస్వోటీ పోలీసులు మాధవ్, రాకేశ్ను గురువారం అదుపులోకి తీసుకున్నారు. వారి దగ్గరి నుంచి రూ.3 లక్షల విలువైన 22 ఎలక్ట్రానిక్ సిగరెట్లను స్వాధీనం చేసుకున్నారు. నిందితులను రిమాండ్కు తరలించారు. దీప్, యష్, తేజ్ పరారీలో ఉన్నట్లు పోలీసులు తెలిపారు.