ఇద్దరు విద్యార్థినులు పాల్వంచలో అదృశ్యం.. ములుగులో ప్రత్యక్షం..

• జ్యోతినగర్​ గురుకులంలో 5 గంటల పాటు టెన్షన్ 
• పర్యవేక్షణ లోపమే అంటున్న పేరెంట్స్ 

పాల్వంచ, వెలుగు : భద్రాద్రికొత్తగూడెం జిల్లా పాల్వంచలోని జ్యో తినగర్ లో ఉన్న మహాత్మ జ్యోతి బాపూలే గురుకుల విద్యాలయం నుంచి 7వ తరగతి చదివే ఇద్దరు విద్యార్థినులు అదృశ్యమై ఐదు గంటల తర్వాత ములుగులో ప్రత్యక్షమైన ఘటన సంచలనం కలిగించింది. సోమవారం తెల్లవారుజామున 5 గంటలకు విద్యార్థినులను సిబ్బంది లెక్కించగా ఇద్దరు విద్యార్థినులు కనిపించడం లేదని గుర్తించారు.  గురుకులం సిబ్బంది తల్లిదండ్రులకు ఫోన్ చేసి ఆరా తీయగా పిల్లలు తమ వద్దకు రాలేదన్నారు. వెంటనే ఇటు గురుకులం సిబ్బంది, అటు పేరెంట్స్​ వారి కోసం వెతకడం ప్రారంభించారు. 

గురుకులం ప్రాంగణంలో సీసీ కెమెరాలు పనిచేయకపోవడం పేరెంట్స్​ ఆగ్రహం వ్యక్తం చేశారు. పర్యవేక్షణ లోపం ఉందని మండిపడ్డారు. స్థానికంగా ఓ నివాసంలో  ఉన్న సీసీ పుటేజీని పరిశీలించగా తెల్లవారుజామున 3 గంటల సమయంలో విద్యార్థినులు ఇద్దరూ బయటకు వెళ్తున్నట్లు రికార్డు అయ్యింది. కాగా, 10 గంటల సమయంలో ఓ విద్యార్థిని బంధువుల ఇంటికి వెళ్లినట్లు వారు సదరు బాలిక తల్లిదండ్రుల కు ఫోన్ చేసి చెప్పడంతో ఊపిరి పీల్చుకున్నారు. అప్పటికే పేరెంట్స్ స్థానిక టౌన్ పోలీస్ స్టేషన్ లో ఫిర్యాదు చేయగా ఎస్పై స్కూల్​ కు వచ్చి ఆరా తీశారు. 

స్కూల్​లో పర్యవేక్షణ లోపించిందని, వెంటనే ప్రిన్సిపాల్ పై చర్యలు తీసుకోవాలని టీడీపీ నాయకులు కళ్యాణం లక్ష్మీపతి, నల్లమల వేణు డిమాండ్ చేశారు. గురుకులం ప్రిన్సిపాల్ సెలవులో ఉండటంతో ఈ విషయమై గురుకులాల ఇన్​చార్జి రాంబాబును వివరణ కోరగా ఘటనపై విచారణ చేపట్టి  నిర్లక్ష్యం వహించిన వారిపై చర్యలు తీసు కుంటామని తెలిపారు. కాగా, ఈఘటన స్థానికంగా 5 గంటలపాటు టెన్షన్​ వాతవరణం సృష్టించింది.