ఎయిడ్స్​ మందులు ఇండియా నుంచే

• ప్రపంచ దేశాలు వాడుతున్న66 శాతం మందులు మనవే
• ఐక్యరాజ్యసమితిలో ఇండియా ఫస్ట్​ సెక్రటరీ పౌలోమి త్రిపాఠి

ఎయిడ్స్​పై పోరాటంలో ఇండియా ముందుంది. ఆ వ్యాధికి వాడే మందుల్లో మూడింట రెండొంతులు ఇండియా నుంచే ప్రపంచ దేశాలకు ఎగుమతి అవుతున్నాయి. సోమవారం ఐక్యరాజ్య సమితి (యూఎన్​) సాధారణ సభ సమావేశాల్లో భాగంగా యూఎన్​లో దేశ శాశ్వత సభ్యత్వ మిషన్​కు ఫస్ట్​ సెక్రటరీ పౌలోమి త్రిపాఠి ఈ విషయం చెప్పారు. ఎయిడ్స్​ చికిత్సలో ఇండియా మెరుగైన అభివృద్ధి సాధించిందన్నారు. హెచ్​ఐవీని పారదోలే చర్యల్లో భాగంగా 2030 నాటికి భారత్​కు మరిన్ని సవాళ్లు ఎదురుకాబోతున్నాయనన్నారు. ప్రపంచ వ్యాప్తంగా ఎయిడ్స్​కు వాడుతున్న మందుల్లో 66 శాతం దేశ ఫార్మా కంపెనీలు తయారు చేసినవేనని చెప్పారు. తద్వారా అభివృద్ధి చెందిన దేశాల్లో ఎయిడ్స్​కు మెరుగైన చికిత్స లభిస్తోందన్నారు. జబ్బుపై పౌర సంఘాలు, వివిధ గ్రూపులు, హెచ్​ఐవీతో బాధపడుతున్నవారు నిర్వహిస్తున్న అవగాహన కార్యక్రమాల వల్లే దేశంలో హెచ్​ఐవీ కేసులు తగ్గాయని ఆమె చెప్పారు.

1995తో పోలిస్తే ఇప్పుడు కేసులు 80 శాతం తగ్గాయన్నారు. 2017 నాటికి ఎయిడ్స్​ వ్యాధిగ్రస్తులు క్షయతో చనిపోయిన కేసులూ 84 శాతం తగ్గాయని తెలిపారు. గత ఏడాది సెప్టెంబర్​ 10న హెచ్​ఐవీ ఎయిడ్స్​ నివారణ, నియంత్రణ చట్టాన్ని ప్రభుత్వం తీసుకొచ్చిందని, దాని వల్ల హెచ్​ఐవీతో బాధపడుతున్న వారికి హక్కులు దక్కుతున్నాయని అన్నారు. విద్య ఉపాధి, ఆరోగ్యం, మౌలిక వసతులు, ఆస్తి హక్కులు, ఇన్సూరెన్స్​ వంటి వాటిలో అవకాశాలు వస్తున్నాయని చెప్పారు. 2017 నాటికి దేశంలో 21 లక్షల మంది ఎయిడ్స్​ వ్యాధిగ్రస్తులున్నారు. ఎయిడ్స్​ రోగులున్న జాబితాలో ఇండియాది మూడో స్థానం.  ఆ ఏడాది 80 వేల కొత్త కేసులు బయటపడగా, 69 వేల మంది చనిపోయారు. 7.5 లక్షల మంది రోగులకు ప్రభుత్వం ఉచితంగా మందులను అందిస్తోంది. 2000 నుంచి 2012 మధ్య కొత్త కేసులు సగానికి తగ్గాయి.