న్యూఢిల్లీ: యూకో బ్యాంకులో జరిగిన రూ.820 కోట్ల విలువైన అనుమానాస్పద ఐఎంపీఎస్ లావాదేవీల కేసులో సీబీఐ దర్యాప్తును ముమ్మరం చేసింది. ఈ మేరకు గురువారం రాజస్థాన్, మహారాష్ట్రలోని 67 ప్రాంతాల్లో సోదాలు నిర్వహించింది. గత ఏడాది నవంబర్10 నుంచి 13 మధ్య 7 ప్రైవేటు బ్యాంకులకు చెందిన 14,600 అకౌంట్ల నుంచి 41 వేల యూకో బ్యాంకు అకౌంట్లలో రూ.820 కోట్లు ఐఎంపీఎస్ద్వారా తప్పుగా జమయ్యాయి. కొందరు కస్టమర్లు ఆ డబ్బులను డ్రా చేసుకున్నారు. దీనిపై యూకో బ్యాంకు అదే నెలలో సీబీఐకి ఫిర్యాదు చేసింది.
నవంబర్ 21న సీబీఐ కేసు నమోదు చేసి ఎంక్వైరీ స్టార్ట్ చేసింది. 2023 డిసెంబర్ లో కోల్కతా, మంగళూరులోని కొందరు వ్యక్తులు, యూకో బ్యాంక్ అధికారులకు సంబంధించిన 13 ప్రాంతాల్లో సోదాలు చేసింది. తాజాగా రాజస్థాన్ లోని జోధ్పూర్, జైపూర్, జలోర్, నాగౌర్, బార్మర్, ఫలోడితో పాటు మహారాష్ట్రలోని పుణేలో రెయిడ్స్చేపట్టింది. సోదాలలో దాదాపు 130 డాక్యుమెంట్లు, 40 ఫోన్లు, హార్డ్ డిస్క్ లు, ఇంటర్నెట్ డాంగిల్ సహా 43 పరికరాలను సీజ్ చేసింది. బ్యాంక్ యాప్ ను మెయింటైన్ చేసిన ఇద్దరు సపోర్ట్ ఇంజనీర్లపైనా ప్రత్యేకంగా కేసు పెట్టింది.
