గుడ్లు ఎక్కడి నుంచి వస్తాయి? ఇదేం పిచ్చి ప్రశ్న.. చిన్న పిల్లల్ని అడిగినా చెబుతారు కదా.. కోడి గుడ్డు పెడుతుందని అనుకుంటున్నారా! అయితే బ్రిటన్లో పిల్లలను ఇదే ప్రశ్న అడిగితే వారు చెప్పిన సమాధానం ఆవులు గుడ్లు పెడతాయని. అవును బ్రిటన్లోని ప్రైమరీ స్కూల్పిల్లలు ఇలాగే అనుకుంటున్నారట. ఇదే విషయం ఓ లేటెస్ట్ సర్వేలో వెల్లడైంది. స్టూడెంట్ల పేరెంట్స్కు, టీచర్స్కు కూడా దిమ్మ తిరిగే రిజల్ట్స్ వచ్చాయట ఈ సర్వేలో. బ్రిటన్ ప్రైమరీ స్కూల్స్లో చదువుతున్న ప్రతి ముగ్గురిలోనూ ఒకరు ఆవులు గుడ్లు పెడతాయని అనుకుంటున్నారని సర్వేలో చెప్పినట్టు మెయిల్ ఆన్లైన్ వెల్లడించింది.
ఇక 6 నుంచి 11 ఏళ్ల వయసున్న స్టూడెంట్లలో ప్రతి పది మందిలోనూ ముగ్గురికి ట్యూనా అనేది చేప నుంచి వస్తుందని తెలియదట. ఇక పదో వంతు మంది తాము అసలు చెర్రీ టమాటాను టేస్ట్ చేయలేదని చెప్పారట. ఒక చారిటీ సంస్థ, ఓ కిచెన్ అప్లయన్స్ కంపెనీ కలిసి ఈ సర్వే చేశాయి. దాదాపు 1000 మంది ప్రైమరీ స్టూడెంట్ల నుంచి శాంపిల్స్ సేకరించారు. ఇందులో వెల్లడైన విషయాలతో ఎక్స్పర్ట్స్ ఆందోళన వ్యక్తం చేస్తున్నారు. తాము తినే తిండి ఎక్కడి నుంచి వస్తుందో కూడా తెలియని స్థితిలో స్టూడెంట్లు ఉన్నారని, యూకే చిన్నారుల్లో కనీస నాలెడ్జ్ కూడా లేదని పేర్కొన్నారు. సరైన వయసులో స్టూడెంట్లకు అవసరమైన నాలెడ్జ్ అందజేయకపోవడమే దీనికి కారణమని అంటున్నారు. గతంలో బ్రిటన్ న్యూట్రిషన్ ఫౌండేషన్ చేసిన సర్వేలోనూ ఇలాంటి సమాధానాలే వచ్చాయి. మొత్తం 27,500 మంది చిన్నారులను ప్రశ్నిస్తే.. ప్రతి ముగ్గురిలోనూ ఒకరు చెట్ల నుంచి చీజ్ వస్తుందని, టమాటాలు భూమి లోపల పండుతాయని జవాబిచ్చారు.
