పెనుబల్లి, వెలుగు: ప్రభుత్వ ఉద్యోగాల నోటిఫికేషన్ల జాప్యంతో మరో నిరుద్యోగి ప్రాణాలు తీసుకున్నాడు. ఖమ్మం జిల్లా పెనుబల్లి మండలం గంగదేవిపాడుకు చెందిన నాగేశ్వరరావు (29) పురుగుల మందు తాగి చనిపోయాడు. కాకతీయ యూనివర్సిటీలో ఎంఏ ఎకనామిక్స్చేసిన అతడు ఐదేండ్లుగా ప్రభుత్వ ఉద్యోగం కోసం ఎదురుచూస్తున్నాడు. తల్లిదండ్రులు పెండ్లి చేసుకోమంటే జాబ్వచ్చిన తర్వాతే చేసుకుంటానని చెప్పి తన తమ్ముడి పెండ్లి చేయించాడు. ఓ వైపు పోటీ పరీక్షలకు ప్రిపేర్ అవుతూనే వ్యవసాయ పనులు చేసేవాడు. ఈ క్రమంలోనే మంగళవారం తమ జామాయిల్తోటలో పురుగు మందు తాగి పడిపోయాడు. కొడుకు ఎంతకు రాకపోవడంతో తండ్రి వెంకట్రామయ్య ఊళ్లో వెతికాడు. చివరికి జామాయిల్ తోటలో అపస్మారక స్థితిలో పడి ఉన్న నాగేశ్వరరావును గమనించి ఆస్పత్రికి తరలించారు. పరిస్థితి విషమించడంతో బుధవారం తెల్లవారు జామున అతడు మృతి చెందాడు.
కేసీఆర్ దిగిపోతేనే ఉద్యోగాలు వస్తయ్
రాష్ట్రంలో కేసీఆర్దిగిపోతేనే ఉద్యోగాలు వస్తాయని, అప్పుడే తన కొడుకులా ఎవరూ ఆత్మహత్య చేసుకోరని మృతుడి తండ్రి వెంకట్రామయ్య ఆవేదన చెందారు. తెలంగాణ వచ్చాక ఉద్యోగాలు వస్తాయనుకుంటే అన్యాయమే జరిగిందని, తన కొడుకు చావుతోనైనా ప్రభుత్వం కండ్లు తెరవాలని కోరారు.
