- అధికారులకు రైల్వే మంత్రి ఆదేశం
హైదరాబాద్, వెలుగు: సికింద్రాబాద్ రైల్వే స్టేషన్ రెనొవేషన్ పనులు 3 ఏళ్లలో పూర్తి చేయాలని అధికారులను కేంద్ర రైల్వే శాఖ సహాయ మంత్రి దర్శన జర్దోశ్ ఆదేశించారు. రూ.700 కోట్లతో ఇంటర్నేషనల్ స్టాండర్డ్స్ తో రెనొవేషన్ పనులు చేపట్టనున్న ఈ స్టేషన్ ను వచ్చే 40 ఏళ్ల వరకు ప్యాసింజర్స్ అవసరాలకు అనుగుణంగా తీర్చిదిద్దాలన్నారు. బుధవారం సికింద్రాబాద్ స్టేషన్ ను తనిఖీ చేసిన మంత్రి..రెనొవేషన్ ప్లాన్ను, పనుల గురించి అధికారులను అడిగి తెలుసుకున్నారు.
అనంతరం రైల్ నిలయంలో దక్షిణ మధ్య రైల్వే జోన్ ఆఫీసర్లతో రివ్యూ చేపట్టారు. స్టేషన్ను సందర్శించి వసతులపై ప్యాసింజర్స్ అభిప్రాయాలను అడిగి తెలుసుకున్నారు.10వ ఫ్లాట్ ఫాంపై ఉన్న చేనేత, కలంకారి ప్రొడక్ట్ స్టాల్ను పరిశీలించారు. ఎస్కలేటర్లు, లిఫ్టులు, ఫుట్ ఓవర్ బ్రిడ్జ్, స్టేషన్ బయట ప్రాంతాలు, పార్కింగ్ ఏరియాతోపాటు స్టేషన్‌‌‌‌లోని అన్ని సౌలతులను కేంద్ర మంత్రి పరిశీలించారు. టీసీఏఎస్ (ట్రైన్ కొలిజన్ అవాయిడెన్స్ సిస్టమ్/ రెండు రైళ్లు ఎదురెదురుగా వచ్చినా ఢీ కొనకుండా ప్రమాదాన్ని నియంత్రించే వ్యవస్థ ) ను ఈ జోన్లో ప్రయోగాత్మకంగా అమలు చేస్తున్నామని దర్శన జర్దోశ్ తెలిపారు. ఈ విధానాన్ని త్వరలో దేశవ్యాప్తంగా అమలు చేస్తామని వెల్లడించారు. కార్యక్రమంలో జీఎం అరుణ్ కుమార్ జైన్, హైదరాబాద్, సికింద్రాబాద్ డీఆర్ఎంలు ఇతర అధికారులు పాల్గొన్నారు.
