రాజన్నకు సిరులు కురిపించిన కురులు
రూ. 19 కోట్లకు తలనీలాల టెండర్
వేములవాడ, వెలుగు : వేములవాడ రాజరాజేశ్వర స్వామి ఆలయం తలనీలాల టెండర్రూ. 19 కోట్లు పలికింది. మంగళవారం ఆలయ ఓపెన్ స్లాబ్ లో 2023–-25 సంవత్సరాలకు తలనీలాలు పోగు చేసుకునే టెండర్ ఈవో కృష్ణ ప్రసాద్ ఆధ్వర్యంలో నిర్వహించారు. అనంతపురం జిల్లా హిందూపురం సుమిత్ ఎంటర్ ప్రైజెస్కు చెందిన నాగరాజు రూ. 19 కోట్ల 8 వేలకు సీల్డ్టెండర్ ద్వారా దక్కించుకున్నారు. 2021–-23లో రూ. 9 కోట్ల ఒక లక్ష ఉన్న టెండర్ ఈసారి పోటీ ఎక్కువ కావడంతో ఏకంగా 10 కోట్ల వరకు పెరిగింది.
బాక్స్లో ఏడుగురు టెండర్లు వేయగా, ఓపెన్టెండర్లో 11 మంది పాల్గొన్నారు. బహిరంగ వేలంలో కడప జిల్లా పొద్దుటూరుకు చెందిన కేవీ ఎంటర్ప్రైజెస్రామాంజనేయులు రూ. 16 కోట్ల 86 లక్షల వరకు పాడారు. అయితే సీల్డ్టెండర్లో ఏకంగా రూ.19 కోట్ల 8 వేలు ఉండడంతో అంతా అవాక్కయ్యారు. తమిళనాడుకు చెందిన శివగంగ ముత్తు మోహన్దాసు రూ. 18 కోట్ల 57 లక్షల 55 వేలకు సీల్డ్టెండర్వేయడం గమనార్హం.
