హైదరాబాద్: మహిళలు ఆర్థికంగా ఎదిగినప్పుడే స్త్రీ, పురుష సమానత్వం సాధ్యమవుతుందని ఉపరాష్ట్రపతి వెంకయ్యనాయుడు అన్నారు. ఇంటర్నేషనల్ ఉమెన్స్ డే సందర్భంగా ఆదివారం హైదరాబాద్లోని పి.ఓబుల్ రెడ్డి పబ్లిక్ స్కూల్, దస్పల్లా హోటల్లో నిర్వహించిన వేడుకలకు ఆయన ముఖ్య అతిథిగా హాజరయ్యారు. ఈ సందర్భంగా వెంకయ్య మాట్లాడుతూ… ప్రతి మహిళ ముఖంలో చిరునవ్వు చూడగలిగినప్పుడే మనం అభివృద్ధి చెందినట్లని అన్నారు. మహిళలకు సరైన అవకాశాలు కల్పించి, వారిని దేశాభివృద్ధిలో భాగస్వాములను చేయాలని సూచించారు. ఈ దిశగా ప్రభుత్వాలు, కార్పొరేట్, స్వచ్ఛంద సంస్థలు కృషి చేయాలని పిలుపునిచ్చారు. ఫ్యూచరిస్టిక్ సిటీస్ సంస్థ ఆధ్వర్యంలో దస్పల్లా హోటల్లో జరిగిన కార్యక్రమంలో గవర్నర్ తమిళిసై, కరుణ గోపాల్, ఓబుల్ రెడ్డి స్కూల్ లో నిర్వహించిన వేడుకల్లో విద్యాసంస్థల చైర్మన్ ఎస్‌వీ రావు, ఆంధ్ర మహిళా సంఘం అధ్యక్షురాలు ఉషారెడ్డి పాల్గొన్నారు.
