ఫలక్నుమా దాస్, దాస్ కా ధమ్కీ లాంటి చిత్రాలతో దర్శకనిర్మాతగానూ మెప్పించిన హీరో విశ్వక్ సేన్.. ఇప్పుడు మరో సినిమా తెరకెక్కించబోతున్నాడు. ‘కల్ట్’ పేరుతో రూపొందుతున్న ఈ చిత్రాన్ని తారక్ సినిమాస్ బ్యానర్ పై సందీప్ కాకరాల నిర్మిస్తున్నారు. గురువారం ఈ మూవీ ఫస్ట్ లుక్ పోస్టర్ను రిలీజ్ చేశారు. ఈ పోస్టర్లో విశ్వక్ సూట్లో కనిపిస్తుండగా, తన చేతిలో రక్తంతో తడిసిన గొడ్డలి కనిపిస్తోంది. హారర్కు సబ్ జానర్ అయిన స్లాషర్ జానర్లో ఈ చిత్రం తెరకెక్కుతోంది.
ఫిబ్రవరి 21న టీజర్ను విడుదల చేయనున్నట్టు అనౌన్స్ చేశారు. గాయత్రి భరద్వాజ్, తారక్ పొన్నప్ప, మురళీ శర్మ, శ్రీకాంత్ అయ్యంగర్, కార్తికేయ, అనిరుధ్ భాస్కర్ కీలక పాత్రలు పోషిస్తున్నారు. నలభై మంది కొత్త నటీనటులను ఈ చిత్రంతో పరిచయం చేస్తున్నారు. భారతదేశంలో తొలి స్లాషర్ ఫిల్మ్గా రూపొందుతున్న ఈ సినిమా టాలీవుడ్లో ఇప్పటివరకు చూడని కొత్త ప్రయత్నంగా నిలవనుందని మేకర్స్ చెబుతున్నారు.
తరుణ్ భాస్కర్ డైలాగ్స్ రాస్తుండగా, రవి బస్రూర్ మ్యూజిక్ అందిస్తున్నారు. అర్వింద్ విశ్వనాథన్ సినిమాటోగ్రాఫర్. తెలుగు, హిందీ, జపనీస్, స్పానిష్, ఇంగ్లీష్ భాషల్లో సినిమాను విడుదల చేయనున్నారు.
